O‘zbekiston Respublikasi Turizm qo‘mitasi

Muzokaralar davomida tomonlar turizm sohasidagi ikki tomonlama hamkorlikning bugungi holati va istiqbollarini muhokama qildilar. 2025-2026 yillarda ikki mamlakat o‘rtasida sayyohlar oqimini ko‘paytirish dasturini amalga oshirishga, shuningdek, sayyohlik kompaniyalarining ikki tomonlama ko‘rgazma va forumlarda, jumladan Rossiyada O‘zbekiston turizmi yili doirasidagi tadbirlarda faol ishtirok etishiga alohida e’tibor qaratildi.

V.Sherbina O‘zbekiston viloyatlari bilan to‘g‘ridan-to‘g‘ri sayyohlik, ta’lim va ishbilarmonlik aloqalarini kengaytirishga qiziqish bildirdi. U Uzoq Sharq aholisining yurtimiz madaniy va tarixiy merosiga bo‘lgan qiziqishi yuqori ekanligini alohida ta’kidladi. Tomonlar turizm sohasida info-turlar, roud-shou va qo‘shma investitsiya loyihalarini tashkil etish bo‘yicha takliflar bilan almashdilar.

D.Abdusalamov o‘z navbatida O‘zbekiston va Rossiya o‘rtasidagi turizmni rivojlantirishda Primore o‘lkasi bilan hamkorlikning strategik ahamiyatga ega ekanligini qayd etdi. Uchrashuv samarali va do‘stona muhitda o‘tdi. Tomonlar amaliy hamkorlikni davom ettirish va mintaqalararo hamkorlik doirasida yangi tashabbuslarni ilgari surish borasida ishonch bildirdilar.