Buyuk Britaniya "O‘zbek karvoni" orqali O‘zbekistonni kashf etmoqda
2025-06-11 16:25:00 / Yangiliklar
5-17 iyun kunlari Buyuk Britaniyaning oltita yirik shahrida o‘tkazilayotgan "O‘zbek karvoni" (Uzbekistan Caravan) madaniy-gastronomik safari doirasida karvon Liverpulga tashrif buyurdi. Shahar aholisi va mehmonlari O‘zbekistonning boy tarixi va madaniyati bilan yaqindan tanishish, shuningdek, mamlakatning sayyohlik salohiyati haqida ma’lumot olish imkoniyatiga ega bo‘ldilar. Barcha mehmonlar uchun tayyorlangan an’anaviy o‘zbek taomi - palovning taqdimoti alohida e’tiborni tortdi.
Ushbu tur Britaniya aholisining O‘zbekistonga istiqbolli sayyohlik yo‘nalishi sifatidagi qiziqishini oshirish, madaniy aloqalarni kengaytirish va mamlakatning mehmondo‘stligini namoyon etishga qaratilgan. Tashkilotchilar O‘zbekistonning turli xil sayyohlarni o‘ziga jalb qilishi mumkin bo‘lgan tarix, tabiat va milliy oshxonaning betakror uyg‘unligini ko‘rsatishga harakat qilmoqda.
"O‘zbek karvoni" 21-22 iyun kunlari Buyuk Britaniya poytaxtining eng mashhur va ko‘p tashrif buyuriladigan sayyohlik maskanlaridan biri - Londondagi Tauyer ko‘prigida o‘tkaziladigan "O‘zbek madaniyati va milliy taomlari" nomli ulkan festivalning muqaddimasi bo‘ladi.