Samarqandda Art Station galereyasida Turk dunyosi rassomlarining xalqaro ko‘rgazmasi bo‘lib o‘tmoqda
2025-05-30 11:50:00 / Yangiliklar
TÜRKTAV jamg‘armasi va “Heritage Turquoise” tashkiloti hamkorligida tashkil etilgan ko‘rgazmada Turkiya Respublikasining Samarqanddagi Bosh konsuli janob Dr. Salih Janer, “Ipak Yo‘li” xalqaro turizm va madaniy meros universiteti prorektori janob Dilmurod Nasimov, shuningdek Italiya, Estoniya, Xorvatiya, Qozog‘iston, Qirg‘iziston kabi mamlakatlardan mehmonlar, Turk dunyosining rassomlari va akademiklar ishtirok etdilar.
Mazkur ko‘rgazma “Ipak yo‘li” bo‘ylab shakllangan madaniyatlar, milliy san’at va tarixiy merosning o‘zaro bog‘liqligini san’at tilida ifodalab berishga qaratilgan bo‘lib, unda turli xalqlarning o‘ziga xos ranglari, naqshlari va tasviriy san’at an’analari uyg‘unlashgan. Ko‘rgazma mehmonlarida nafaqat estetik zavq, balki madaniy mushtaraklik va tarixiy ildizlarga nisbatan chuqur qiziqish uyg‘otdi.
Ko‘rgazmada namoyish etilgan asarlar tadbir yakunida Art Station Galereyasiga sovg‘a qilinib, doimiy kolleksiyaga kiritiladi.