Buxoroda xalqaro “Ipak va ziravorlar” festivali bo‘lib o‘tadi
2025-05-22 10:40:00 / Yangiliklar
Joriy yilning 6-8 iyun kunlari Buxoroda an’anaga aylangan “Ipak va ziravorlar” festivali o‘tkaziladi.
Festival dasturidan mavzuli chiqishlar, sharqona ziravorlar, shuningdek, o‘zbek ipak va paxta matolaridan tayyorlangan xon-atlas, adras, ikat yarmarkalari, musiqiy konsertlar, etno-moda namoyishlari, hunarmandchilik yarmarkalari, ko‘ngilochar tadbirlar, gala-konsertlar o‘rin olgan.
“Ipak va ziravorlar” festivali dunyoning turli burchaklaridan ustalar, hunarmandlar, dizaynerlar, musiqachilar va sayyohlarni o‘ziga jalb etib, qadimiy Buxoroni madaniy almashinuv va betakror sharqona ruhning markaziga aylantiradi. Bu noyob voqea nafaqat an’analar va hunarmandchilikni asrab-avaylaydi, balki turizmni rivojlantirish va xalqlar o‘rtasidagi madaniy aloqalarni mustahkamlashga ham katta hissa qo‘shadi.