O‘zbekiston turizm salohiyati Dubay shahrida bo‘lib o‘tayotgan – “ATM 2025” xalqaro turizm ko‘rgazmasida namoyish etilmoqda
2025-04-30 11:05:00 / Yangiliklar
Ko‘rgazmada Turizm qo‘mitasi tomonidan Xorazm va Andijon viloyatlari hamda yetakchi mahalliy sayyohlik agentliklari va aviakompaniyalar ishtirokida O‘zbekistonning yagona milliy stendi tashkil qilindi.
Tadbir doirasida mehmonlarga mamlakatimizning boy tarixiy-madaniy merosi, tabiati, gastronomik yo‘nalishlari, ziyorat, tibbiy, MICE va ekoturizm imkoniyatlari haqida keng qamrovli taqdimotlar qilinmoqda. Xorijiy tur kompaniya vakillariga yangi turistik maskanlari, yo‘nalishlari va xizmatlari tanishtirilmoqda.
“ATM 2025” ning birinchi ikki kunida turli davlatlarning tur biznes vakillari va potensial hamkorlar bilan 300 ga yaqin B2B va G2B uchrashuvlar o‘tkazildi hamda mamlakatimizga sayyohlar oqimini oshirish, sohada kadrlarni qayta tayyorlash, mamlakatimiz turizm salohiyatini ustuvor bozorlarda keng targ‘ib qilishga qaratilgan 100 dan ortiq aniq kelishuvlarga erishildi.
Shuningdek, tadbirda mamlakatimizning boy madaniyati va san’atini namoyish etuvchi milliy kuy va qo‘shiqlar namoyish etilmoqda.
Ma’lumot uchun: “ATM 2025” – bu global sayyohlik sanoati vakillari, xususan, turistik kompaniyalar, mehmonxonalar, aviakompaniyalar va milliy turizm tashkilotlari uchun mintaqadagi eng yirik ko‘rgazma hisoblanadi. Har yili 150 dan ortiq mamlakatdan 2 800 dan ziyod tashkilotlar va 40 mingga yaqin ishtirokchilarni jalb etuvchi mazkur tadbir Yaqin Sharq turizm bozorining strategik rivojlanish yo‘nalishlarini belgilashda muhim o‘rin tutadi. Tadbirga mintaqadan O‘zbekistondan tashqari qator davlatlar, jumladan, Qozog‘iston, Qirg‘iziston, Ozarbayjon vakillari ishtirok etmoqda.