“Orol baliqlaridan 99 turdagi taomlar” xalqaro gastronomik festivali o‘tkazildi
2025-04-21 16:45:00 / Yangiliklar
Qoraqalpog‘iston Respublikasida o‘tkazilgan «Orol turizmi» xalqaro haftaligi doirasida Nukus shahrida «Orol baliqlaridan 99 turdagi taomlar» xalqaro gastronomik festivali bo‘lib o‘tdi.
Tadbirda mahalliy oshpazlarning baliq taomlarini tayyorlash bo‘yicha mahorat darslari tashkil etildi. Shuningdek, oshpazlar o‘rtasida o‘zaro bellashuv bo‘lib o‘tdi. Baliqdan tayyorlangan 100 ga yaqin taomlar festival ishtirokchilari va hakamlar e’tiboriga havola etildi.
Taomlar taqdimotidan tashqari mahalliy hunarmandlarning ko‘rgazmalari ham namoyish qilindi. Shuningdek, milliy estrada va folklor ijrochilari, milliy raqs ansambli tomonidan konsert dasturi va boshqa ko‘ngilochar tadbirlar tashkil etildi.
Festival yakunida baliqlardan tayyorlangan, Orolbo‘yida yashovchi aholi vakillariga xos taomlarni tayyorlashda o‘zaro bellashgan oshpazlar orasidan aniqlangan g‘olib va sovrindorlar qimmatbaho sovg‘alar bilan taqdirlandi.