O‘zbekiston Respublikasi Turizm qo‘mitasi

Tadbirni O‘zbekiston Respublikasi Bosh vaziri o‘rinbosari Jamshid Xodjayev va mamlakatimizda rasmiy tashrif bilan bo‘lib turgan Vetnam Milliy majlisi Raisi Chan Txan Man kirish so‘zlari bilan ochib berdilar.

Davra suhbatida so‘zga chiqqan Jamshid Abdusalomov ikki tomonlama munosabatlarni yanada mustahkamlash muhimligini ta’kidlab, turizm ikki mamlakat iqtisodiyotida muhim o‘rin tutib, nafaqat iqtisodiyotni rivojlantirish, balki xalqlar o‘rtasidagi madaniy almashinuvga ham hissa qo‘shishini ta’kidladi.

Shuningdek, viza rejimini soddalashtirish hamda O‘zbekiston va Vetnamda o‘tkaziladigan xalqaro sayyohlik ko‘rgazmalarida ishtirok etish orqali ikki mamlakat turizm salohiyatini birgalikda targ‘ib qilish masalalari ham ko‘rib chiqildi.

Davra suhbati yakunida B2B formatidagi uchrashuvlar tashkil etildi. Unda Turizm qo‘mitasi raisining birinchi o‘rinbosari Djamshid Abdusalamov Vetnam Madaniyat, sport va turizm vaziri o‘rinbosari Fan Tam, shuningdek, Vetnamning “Sovico Group” va “Vietnam Airlines Corporation” kompaniyalari rahbariyati bilan muzokaralar olib bordi. Tomonlar turizm sohasidagi hamkorlikni kengaytirish, tajriba almashish va qo‘shma loyihalarni amalga oshirish yo‘llarini muhokama qildilar.

Eslatib o‘tamiz, 2025-yil 7-aprel kuni O‘zbekiston Respublikasi Prezidenti Shavkat Mirziyoyev Vetnam Milliy majlisi Raisi Chan Txan Man boshchiligidagi delegatsiya bilan uchrashuvida madaniyat va turizm sohalaridagi almashinuvlarni, shu jumladan vizasiz tartibni joriy qilish orqali rivojlantirish masalalarini muhokama qildilar.