O‘zbekiston Respublikasi Turizm qo‘mitasi

Tadbirning asosiy maqsadi sayyohlik sohasidagi xalqaro hamkorlikni rivojlantirish, Navro‘z bayramini umumiy tarixning bir qismi sifatida ommalashtirishdir. Shuningdek, Navro‘zni Markaziy Osiyoning eng muhim sayyohlik va madaniy brendlaridan biri sifatida targ‘ib qilish orqali mintaqada jozibador va o‘ziga xos sayyohlik mahsulotlarini yaratish uchun asos yaratish ko‘zda tutilgan.

O‘zbekiston Markaziy Osiyoning yagona sayyohlik hududini yanada rivojlantirish uchun faol harakat qilmoqda. Bu doirada sayyohlar mintaqaning bir nechta mamlakatlariga osonlik bilan tashrif buyurib, umumiy tarix va madaniyatlar xilma-xilligi bilan tanishishlari mumkin.

Forumda O‘zbekistonning mintaqa sayyohlik jozibadorligini oshirish va sayyohlar oqimini ko‘paytirishga qaratilgan tashabbuslar muhokama qilindi.

Jumladan, O‘zbekiston, Qirg‘iziston va Tojikistonning noyob tabiiy qo‘riqxonalari, tog‘ tizimlari, ko‘llari, shuningdek, qadimiy shaharlari va boshqa diqqatga sazovor joylariga tashrif buyurishni o‘z ichiga olgan “Farg‘ona vodiysining oltin sayyohlik halqasi”ni yaratish masalasi ko‘rib chiqildi.

Shuningdek, mamlakatlarimizda o‘tkaziladigan bayram tadbirlarini birlashtiruvchi “Navro‘z - Markaziy Osiyo qalbida” deb nomlangan qo‘shma madaniy-sayyohlik yo‘nalishini tashkil etish masalasi ham muhokama qilindi.

Bunday yo‘nalishlar birlik ramzi va xalqaro turizm bozori uchun noyob mahsulotga aylanib, madaniy merosni targ‘ib qilishga hamda turizm sohasidagi kichik va o‘rta biznesni rivojlantirishga xizmat qiladi.

Aytish joizki, Navro‘z umumjahon madaniy boylik sifatida e’tirof etilgan bo‘lib, 2009 yilda YuNYeSKOning Insoniyat nomoddiy madaniy merosi ro‘yxatiga kiritilgan.

Forum doirasida ishtirokchi davlatlar sayyohlik kompaniyalarining marshrutlari va mahsulotlari taqdimoti hamda B2B uchrashuvlari o‘tkazildi. Ular natijasida hamkorlikni yanada chuqurlashtirish va sayyohlarni jalb etishga qaratilgan bitimlar imzolandi.