O‘zbekiston Respublikasi Turizm qo‘mitasi

Bugungi kunda Jizzax viloyatining “Zomin” turistik-rekreatsion zonasi hududida jahon standartlari asosida Wyndham brendi ostidagi mehmonxonalar, sog‘lomlashtirish markazi, uzunligi 2102 metr bo‘lgan dor yo‘li, shuningdek, uzunligi 305, balandligi 150 metrni tashkil qiladigan osma ko‘prik kabi noyob obyektlar faoliyat yuritmoqda.

Shu bilan birga, “Zomin”da turli toifadagi yangi mehmonxonalar, 3100 metr balandlikda dor yo‘li, tog‘ chang‘i trassalari, yozgi attraksionlar, sport maydonchalari, anjumanlar o‘tkaziladigan zallar, suzish havzalari, golf maydoni va muz konki maydoni paydo bo‘ladi. 8 gektar maydonni egallagan keng ko‘lamli ko‘ngilochar majmua barpo etiladi, sayyohlarning istagi bo‘yicha esa ot minish markazi qurilishi rejalashtirilgan.

Bularning barchasi viloyatning ichki turizmini rivojlantirish va tashrif buyurayotgan xorijiy fuqarolar sonini ko‘paytirishga o‘zining munosib hissasini qo‘shadi.