O‘zbekiston Respublikasi Turizm qo‘mitasi

Tadbirda Turizm qo‘mitasi raisi o‘rinbosari Sardor Niyazov, Sport vazirligi, viloyatlar hokimliklari va O‘zbekistonda joylashgan kurort majmualari direksiyalari vakillari, investorlar, shuningdek, mamlakatimizda bo‘lib turgan Avstriyalik ekspertlar va tog‘ kurortlarini jihozlash uchun uskunalar ishlab chiqaruvchilar biznes delegatsiyasi va boshqalar ishtirok etdi.

Sardor Niyazov davra suhbati ishtirokchilarini qutlab, turizm sohasiga innovatsion texnologiyalarni joriy etish sohani rivojlantirish uchun muhim qadam ekanligini va O‘zbekiston bu borada faol ish olib borayotganini ta’kidladi. “Barcha mavsumda ishlayotgan dam olish maskanlari infratuzilmasini yaxshilashga alohida e’tibor qaratilmoqda, bu esa qishki sport turlari va turizmni rivojlantirish uchun yangi istiqbollarni ochadi”, - dedi Sardor Niyazov.

Tadbir davomida ma’lum qilinishicha, bugungi kunga qadar tomonlar turizm sohasida qator infratuzilmaviy loyihalarni birgalikda amalga oshirgan. Xususan, “Doppelmayr” kompaniyasi hamkorligida “Chorvoq” turistik-rekreatsion zonasi hududida bir nechta dor yo‘llari (Chinorkent, Amirsoy) ishga tushirildi. Shuningdek, Surxondaryo, Qashqadaryo va Toshkent viloyatlarida Avstriya kompaniyalari bilan qo‘shma loyihalar amalga oshirilmoqda.

“Bugun infratuzilma va servisni yo‘lga qo‘yish va rivojlantirish sohasida faoliyat yurituvchi 8 ta Avstriya kompaniyalari vakillari O‘zbekistonda rasmiylar va xususiy investorlar bilan mamlakatda loyihalarni joriy etish masalalarini muhokama qilish uchun bo‘lib turibdi. Ayni damda o‘zbekistonlik va avstriyalik hamkorlar o‘rtasida juda qiziqarli va samarali munozara bo‘lib o‘tmoqda, bu esa kelgusidagi hamkorlik uchun katta salohiyat mavjudligini ko‘rsatmoqda. Avstriya kompaniyalarining tajribasi va O‘zbekistonda turizmni rivojlantirish imkoniyatlarini hisobga olgan holda, biz muvaffaqiyatli loyihalarni amalga oshirishimiz va tog‘ kurortlari infratuzilmasini sezilarli darajada yaxshilashimiz mumkinligiga ishonchim komil”, - dedi Avstriya elchixonasining savdo bo‘yicha maslahatchisi Rudolf Lukavski.

Davra suhbati doirasida “B2B” uchrashuvlari bo‘lib o‘tdi. Ishtirokchilar O‘zbekistonda qishki turizmni rivojlantirish, ayniqsa, zamonaviy texnologiyalarni joriy etish va sayyohlik xizmatlari sifatini yaxshilash masalalariga e’tibor qaratdilar. Xalqaro investitsiyalarni jalb qilish, qishki sport va turizm sohalarida jahonning yetakchi kompaniyalari bilan sheriklik aloqalarini o‘rnatish imkoniyatlariga alohida e’tibor qaratildi. Mutaxassislar Avstriyaning qishki turizmni tashkil etish bo‘yicha boy tajribaga ega ekanligini hisobga olgan holda tajriba almashish muhimligini ta’kidladilar. Avstriya delegatsiyasi vakillari mamlakatda tog‘ kurortlarini yanada rivojlantirish bo‘yicha o‘z qarashlari bilan o‘rtoqlashdilar.