O‘zbekiston Respublikasi Turizm qo‘mitasi

Muloqot O‘zbekiston Respublikasi Prezidentining 2026 yil 26 maydagi “Kichik biznes subyektlarining o‘sishi uchun yanada qulay iqtisodiy va ma’muriy shart-sharoitlar yaratish to‘g‘risida” PF-100-son Farmoni doirasida o‘tkazildi.

Suhbatning asosiy mavzusi — turizm sohasi uchun joriy etilayotgan qo‘shilgan qiymat solig‘ining (QQS) soddalashtirilgan tartibi bo‘ldi. Bu tartibga o‘tgan soliq to‘lovchilar uchun barcha tovar va xizmatlarni realizatsiya qilishda yagona — 6 foizlik stavka qo‘llaniladi. Tadbirkorlarni qiziqtirgan birinchi savol — bu tartib turizm xizmatlariga ham tatbiq etiladimi, degan masala bo‘ldi. Javob ijobiy: joylashtirish vositalari, turoperator xizmatlari va mehmonxona faoliyati xizmat ko‘rsatish sohasiga kirgani bois, ular ham 6 foizlik soddalashtirilgan QQS tartibidan foydalana oladi.

Ko‘pchilikni o‘ylantirgan yana bir masala — yangi tartibga o‘tishning muddati bo‘ldi. Korxona yil o‘rtasida ham soddalashtirilgan tartibga o‘ta oladi: o‘tish xabarnoma yuborilgan oydan keyingi oyning birinchi sanasidan amalga oshiriladi. Bunda 6 foizlik QQS to‘lovchidan tovar yoki xizmat sotib olgan umumiy tartibdagi QQS to‘lovchi korxonalar qabul qilingan hisob-faktura bo‘yicha ushbu 6 foizlik summani hisobga olish huquqiga ega bo‘ladi — ya’ni tartib zanjirdagi hamkorlar uchun ham tushunarli ishlaydi.

Muloqot davomida turizm sohasi tadbirkorlarini qiziqtirgan savollarga berilgan javoblar bilan quyida tanishishingiz mumkin:

Savol: 6 foizlik QQS stavkasi barcha tovar va xizmatlarga tatbiq etiladimi yoki istisnolar ham mavjudmi?

Javob: QQSning soddalashtirilgan tartibiga o‘tgan soliq to‘lovchilar uchun barcha tovar va xizmatlar realizatsiyasi uchun 6 foiz stavka qo‘llaniladi.

Savol: Ushbu tartibni tanlagan tadbirkor avval foydalanib kelgan QQS imtiyozlari va keshbek mexanizmlaridan mahrum bo‘ladimi?

Javob: QQSning soddalashtirilgan tartibiga o‘tgan korxonalarga avval foydalanib kelgan QQS imtiyozlari va keshbek mexanizmlari qo‘llanilmaydi.

Savol: Soddalashtirilgan tartib eksport yoki import qiluvchi korxonalarga ham tatbiq etiladimi?

Javob: Ha, tatbiq etiladi. Bunda eksport operatsiyalari uchun ham 6 foiz QQS hisoblanadi, import operatsiyalari uchun esa bojxonada to‘langan QQS hisobga olinmaydi.

Savol: 6 foizlik QQS tizimiga o‘tgan tadbirkorlarga nisbatan xavf tahlili va kameral tekshiruv mezonlari o‘zgaradimi?

Javob: Barcha tadbirkorlik subyektlari uchun xavf tahlili va kameral tekshiruv mezonlari bir xil amal qiladi.

Savol: Soddalashtirilgan tartibga o‘tish paytida ombordagi tovarlar bo‘yicha avval to‘langan QQS taqdiri qanday bo‘ladi?

Javob: Soddalashtirilgan tartibga o‘tish paytida ombordagi tovarlar bo‘yicha avval to‘langan QQS summasi hisobdan chiqariladi.

Suhbat davomida Soliq qo‘mitasi mutaxassislari tomonidan tadbirkorlarni qiziqtirgan yana bir qator savollarga ham javoblar berildi.