Malayziya Elchisi bilan uchrashuvda ikki tomonlama turizm aloqalari sarhisob qilindi
2026-06-04 21:35:00 / Yangiliklar
Uchrashuvda O‘zbekiston va Malayziya o‘rtasidagi do‘stona munosabatlar hamda turizm sohasidagi ko‘p qirrali hamkorlikning bugungi holati va istiqbollari muhokama qilindi. Tomonlar keyingi yillarda ikki davlat o‘rtasidagi munosabatlar izchil rivojlanib borayotganini, jumladan, turizm sohasida amaliy hamkorlikni kengaytirish bo‘yicha muhim natijalarga erishilganini mamnuniyat bilan qayd etdilar.
Suhbat chog‘ida mamlakatlar o‘rtasidagi turistik almashinuvlar hajmini oshirish, O‘zbekistonning boy madaniy-tarixiy merosi va turizm salohiyatini Malayziya jamoatchiligi o‘rtasida keng targ‘ib qilish, shuningdek, ziyorat turizmi, madaniy turizm va boshqa istiqbolli yo‘nalishlarda hamkorlikni yanada rivojlantirish masalalari yuzasidan atroflicha fikr almashildi.
Turizm qo‘mitasi tomonidan janob Ilxam Tuabin Illiasning O‘zbekiston va Malayziya o‘rtasidagi munosabatlarni, shu jumladan turizm sohasidagi aloqalarni mustahkamlashga qo‘shgan salmoqli hissasi alohida e’tirof etildi. Elchining mamlakatlarimiz o‘rtasidagi o‘zaro anglashuv, ishonch va do‘stona munosabatlarni rivojlantirish borasidagi faol sa’y-harakatlari yuqori baholandi.
O‘z navbatida, janob Ilxam Tua bin Illias O‘zbekiston tomoni bilan o‘zaro hamkorlik yuqori darajada tashkil etilganini ta’kidlab, mamlakatimizda faoliyat yuritgan davrida ko‘rsatilgan amaliy ko‘mak va e’tibor uchun minnatdorlik bildirdi. Shuningdek, u O‘zbekistonda turizm sohasini rivojlantirish borasida amalga oshirilayotgan keng ko‘lamli islohotlar va mamlakatning xalqaro turizm bozoridagi nufuzi ortib borayotganini yuqori baholadi.
Tomonlar O‘zbekiston va Malayziya o‘rtasidagi hamkorlik aloqalari kelgusida ham o‘zaro manfaatli asosda izchil rivojlanib borishiga ishonch bildirdilar hamda mavjud hamkorlik salohiyatidan yanada samarali foydalanish muhimligini qayd etdilar.
Uchrashuv o‘zaro ishonch va konstruktiv ruhda o‘tdi. Muhokama qilingan masalalar O‘zbekiston va Malayziya o‘rtasida turizm sohasidagi hamkorlikni yanada mustahkamlashga xizmat qilishiga ishonch bildirildi.