O‘zbekiston Respublikasi Turizm qo‘mitasi

Jumladan, Rossiya Federatsiyasi Iqtisodiy rivojlanish vaziri o‘rinbosari D. Vaxrukov bilan uchrashuv davomida “Rossiyada O‘zbekiston turizm yili” doirasida 2024–2025 yillarda amalga oshirilgan tadbirlar yakunlari ko‘rib chiqildi. Tomonlar O‘zbekistonning turistik salohiyatini Rossiya Federatsiyasi hududlarida targ‘ib qilish bo‘yicha o‘tkazilgan tadbirlar samaradorligini muhokama qildilar. Shu bilan birga, O‘zbekiston tomoni tomonidan Rossiya hududlarida “O‘zbekiston turizm kunlari”ni tashkil etish tashabbusi ilgari surildi hamda mazkur loyiha yuzasidan tegishli muzokaralarni davom ettirishga kelishib olindi.

Uchrashuv yakunida 2026–2027 yillarda Rossiya Federatsiyasi hududlarida “O‘zbekiston turizm kunlari” dasturini ishlab chiqish, turizm sohasi vakillari va turoperatorlar ishtirokida taqdimot tadbirlarini tashkil etish, shuningdek hududlararo turizm hamkorligini kengaytirish bo‘yicha kelishuvlarga erishildi. Shuningdek, O‘zbekiston Respublikasini Rossiya turoperatorlari uchun ichki turizmga tenglashtiriladigan mamlakatlar ro‘yxatiga kiritish masalasi ham muhokama qilindi. Ushbu yo‘nalishda Rossiyaning vakolatli idoralari bilan maslahatlashuvlar o‘tkazish, o‘zaro turistik almashinuvni rivojlantirish bo‘yicha takliflar tayyorlash hamda turistik oqimlarni rag‘batlantirish mexanizmlarini ishlab chiqish rejalashtirildi.

Mordoviya Respublikasi rahbari A. Zdunov bilan o‘tkazilgan uchrashuvda ham Rossiya hududlarida “O‘zbekiston turizm kunlari”ni tashkil etish masalasi muhokama qilindi. Tomonlar tadbirlarning sanasi va formatini kelishish, turoperatorlar o‘rtasida B2B va B2C uchrashuvlarini tashkil etish, shuningdek O‘zbekistonning turistik salohiyatini namoyish etuvchi madaniy va gastronomik taqdimotlarni tayyorlash yuzasidan fikr almashdilar.

Shuningdek, Tatariston Respublikasi mustaqil kasaba uyushmalari federatsiyasi raisi E. Kuzmicheva bilan uchrashuv davomida Tatariston korxonalari xodimlari uchun korporativ turistik dasturlarni tashkil etish masalasi ko‘rib chiqildi. Uchrashuv natijasida maxsus turistik paketlar va sog‘lomlashtirish dasturlarini ishlab chiqish, O‘zbekiston kurort va sanatoriylari bilan hamkorlikni yo‘lga qo‘yish, kasaba uyushmalari o‘rtasida to‘g‘ridan-to‘g‘ri hamkorlikni rivojlantirish hamda muntazam turistik almashinuv mexanizmlarini shakllantirish bo‘yicha dastlabki kelishuvlarga erishildi.

Bundan tashqari, Tatariston davlat turizm qo‘mitasi raisi S. Ivanov bilan bo‘lib o‘tgan muzokaralarda turizm sohasida ikki tomonlama hamkorlikni yanada kengaytirish masalalari muhokama qilindi. Tomonlar qo‘shma marketing kampaniyalarini amalga oshirish, turizm sohasi subyektlari o‘rtasida to‘g‘ridan-to‘g‘ri hamkorlikni rivojlantirish hamda ikki tomonlama hujjatlar loyihalarini tayyorlash va kelishish bo‘yicha o‘zaro fikr almashdilar.

Mazkur uchrashuvlar O‘zbekiston va Rossiya hududlari o‘rtasida turizm sohasidagi hamkorlikni yangi bosqichga olib chiqish, o‘zaro turistlar oqimini ko‘paytirish hamda ikki mamlakat o‘rtasidagi madaniy-gumanitar aloqalarni yanada mustahkamlashga xizmat qilishi qayd etildi.