Yaponiya teleloyihasi O‘zbekiston bo‘ylab sayohat haqidagi hujjatli dasturni suratga olmoqda
2026-05-13 20:05:00 / Yangiliklar
“The Global Train Journey” – NHK milliy teleradiokompaniyasining NHK BS kanalida namoyish etiladigan mashhur teledasturlardan biri. Ko‘rsatuv doirasida taniqli yaponiyalik teleboshlovchi poyezdda turli mamlakatlarga sayohat qiladi, xalqlarning madaniyati va an’analari bilan tanishadi, shuningdek, mahalliy aholi bilan muloqot qiladi. Koʻrsatuvning har bir soni qariyb bir million tomoshabinni jamlaydi.
Tashrifning asosiy maqsadi - Buyuk Ipak yo‘lining temir yo‘l yo‘nalishi bo‘ylab sayohat orqali O‘zbekistonning boy tarixi, madaniyati, me’morchiligi, milliy an’analari va kundalik hayoti haqida hujjatli film tayyorlashdan iborat. Suratga olish jarayonida jamoa Toshkent, Samarqand, Buxoro va Nukus shaharlarida bo‘ladi.
Suratga olish dasturidan temir yo‘l vokzallari, “Afrosiyob” tezyurar poyezdi, “Sharq” poyezdi, Toshkent metrosi, shahar manzaralari, tarixiy obidalar va an’anaviy sharq bozorlari o‘rin olgan. Dastur efirga uzatilishi orqali keng yapon auditoriyasi Oʻzbekistonning turizm salohiyati, madaniy merosi va zamonaviy hayoti bilan yanada yaqindan tanishishi kutilmoqda.