Turistlar uchun elektron deklaratsiyani onlayn to‘ldirish tizimi to'liq ishga tushirildi
2026-01-19 17:15:00 / Yangiliklar
Mobil ilova sodda va qulay interfeysga ega boʻlib, jismoniy shaxsning pasport maʼlumotlarini kiritish orqali deklaratsiyaning asosiy bandlarini avtomatik toʻldirish imkonini beradi.
Yoʻlovchi esa asosan kirib kelayotgan yoki chiqib ketayotgan davlatiga doir hamda olib oʻtayotgan valyuta qimmatliklari va boshqa tovarlarga doir maʼlumotlarni kiritsa, kifoya!
Fuqarolarga qoʻshimcha qulayliklar yaratish maqsadida mobil qurilmalarning IMEI-kodlarini Yoʻlovchi bojxona deklaratsiyada qoʻlda yozish oʻrniga mobil ilovadan foydalangan holda skanerlash orqali 15 raqamdan iborat IMEI kodlarni avtomatik toʻldirish imkoniyati ham mavjudligini alohida taʼkidlash kerak.
Bundan tashqari, qoʻshimcha tarzda chegara bojxona postlariga Infokiosklar ham oʻrnatish va ular orqali YBD yuborish boʻyicha ham ishlar olib borilmoqda.
Chegara bojxona postlarida jismoniy shaxslar tomonidan tizimning mobil ilovasidan foydalanish uchun bepul internet (Wi-Fi) hududlar tashkil etiladi.
Deklaratsiyani taqdim etishning raqamlashtirilishi respublikaning xalqaro turistik imiji oshishiga xizmat qiladi.
Eng muhimi, yoʻlovchilar deklaratsiyani oʻziga qulay vaqtda va joyda toʻldirishlari mumkin.
Ilovadan foydalanish asnosida yoʻlovchilar bojxona qoidalaridan ham voqif boʻlishadi.
Deklaratsiyani qogʻozda taqdim etganda uchrashi mumkin boʻlgan kamchiliklar - deklaratsiyani dasturga kech kiritilishi, xato kiritilishi yoki kiritilmay qolishi, shuningdek deklaratsiyaga oʻzboshimchalik bilan oʻzgartirish kiritish kabi holatlarning oldi olinadi.
Hozirda tizimning "Android" va "IOS" operatsion tizimlarida ishlovchi mobil qurilmalari uchun “Yoʻlovchi-deklaratsiyasi” ilovasi yaratilgan boʻlib, mazkur ilovani “Play Market” hamda “App store” ilovalari orqali yuklab olishingiz mumkin.
“Yoʻlovchi bojxona deklaratsiyasi” axborot tizimining yangi talqini va uning mobil ilovasi dastlab “Toshkent” xalqaro aeroportida sinov tariqasida ishga tushirilgan boʻlib, joriy yilning 1-noyabridan boshlab barcha chegara oʻtkazish punktlarida toʻliq joriy etiladi.
Eslatib oʻtamiz, mazkur yangilik Oʻzbekiston Respublikasi Prezidentining 25.03.2025 yildagi PF-57-son Farmoniga asosan amalga oshirilmoqda.
Ushbu hujjatga koʻra, 2025-yil 1-noyabrdan boshlab oʻtkazish punktlari orqali harakatlanayotgan yoʻlovchilarga qulaylik yaratish maqsadida yoʻlovchi bojxona deklaratsiyasining mobil ilovasi amaliyotga joriy etish nazarda tutilgan.