IHT Turizm vazirlarining 7-yig‘ilishi tadbirlari doirasida O‘zbekiston turizm salohiyati ilgari surildi
2026-05-01 18:45:00 / Yangiliklar
Xizmat safari davomida delegatsiya “Shusha – 2026-yil uchun IHT Turizm poytaxti” tadbirining ochilish marosimi hamda gastronomik festivalda qatnashdi.
IHT Turizm vazirlarining 7-yig‘ilishi doirasida “Iqtisodiy hamkorlik tashkilotiga a’zo davlatlar o‘rtasida turizm xizmatlarini kengaytirish bo‘yicha 2026–2030-yillarga mo‘ljallangan "Yo‘l xaritasi"” loyihasi muhokama qilindi, IHT kotibiyati tomonidan turizm sohasida amalga oshirilgan ishlar to‘g‘risida ma’lumot berildi, Qozog‘iston Respublikasining Aktau shahri 2030-yilda IHTning Turizm poytaxti etib belgilandi va Shusha deklaratsiyasi qabul qilindi.
Tadbir doirasida O‘zbekistonda turizm sohasida amalga oshirilayotgan islohotlar, IHTga a’zo davlatlar bilan hamkorlikda amalga oshirilayotgan loyihalar hamda mamlakatning turizm salohiyati namoyish etildi. Shuningdek, tashkil etilgan gastronomik festivalda O‘zbekistonning milliy taomlari tashrif buyuruvchilarga taqdim etildi.
Tadbir davomida Qozog‘iston, Tojikiston va Turkmaniston delegatsiya rahbarlari hamda ekspertlari bilan uchrashuvlar tashkil etildi. Muzokaralarda ikki tomonlama hamkorlikni rivojlantirish, transchegaraviy turistik marshrutlarni ishlab chiqish, ikki davlat fuqarolarining ichki shaxsni tasdiqlovchi hujjatlar asosida o‘zaro tashriflarini tashkil etish va turoperatorlar o‘rtasida B2B uchrashuvlarni tashkil etish hamda hamkorlikda targ‘ibot ishlarini olib borish masalalari muhokama qilindi.