O‘zbekiston Respublikasi Turizm qo‘mitasi

Qirg‘iziston tomoni raisligida o‘tgan uchrashuvda ishtirokchilar turizm sohasining hozirgi holati hamda ShHT doirasida hamkorlikni rivojlantirish istiqbollarini muhokama qildilar.

Mazkur tadbir doirasida O‘zbekiston delegatsiyasi bir qator ikki tomonlama uchrashuvlar o‘tkazdi, jumladan Belarus Respublikasi Milliy turizm agentligi davlat muassasasi direktori Kirill Masharskiy, Qirg‘iziston Respublikasi Vazirlar Mahkamasi huzuridagi Turizmni rivojlantirish davlat agentligi direktori Eduard Kubatov, Tojikiston Respublikasi Hukumat huzuridagi Turizmni rivojlantirish qo‘mitasi raisi Djamshed Jumaxonzoda bilan muzokaralar olib bordi.

Muzokaralar davomida tomonlar turizm sohasida ikki tomonlama munosabatlarni yanada rivojlantirish va mustahkamlash istiqbollarini muhokama qildilar. Sohaga oid tuzilmalar o‘rtasidagi hamkorlikni kengaytirish hamda turistik oqimni oshirish uchun qulay sharoitlar yaratishga alohida e’tibor qaratildi.

Uchrashuvlarning asosiy mavzularidan biri sayohatlarni tashkil etishni soddalashtirish va yo‘nalishlarning jozibadorligini oshirishga xizmat qiladigan turistik koridorni shakllantirish bo‘ldi. Shuningdek, ishtirokchilar uchinchi davlatlardan sayyohlarni jalb etish uchun yangi turistik marshrutlarni ishlab chiqish imkoniyatlarini ham ko‘rib chiqdilar.

Muzokaralar yakunida tomonlar hamkorlikni faollashtirishdan manfaatdor ekanliklarini tasdiqlab, turizm sohasini rivojlantirishga qaratilgan qo‘shma tashabbuslarni amalga oshirishga tayyor ekanliklarini bildirdilar.