O‘zbekiston Respublikasi Turizm qo‘mitasi

Uchrashuv davomida tomonlar O‘zbekistonda turizmni rivojlantirish imkoniyatlari, uning turistik salohiyati va xalqaro sayyohlar uchun jozibadorligini muhokama qildilar. Shuningdek, ustuvor turistik yo‘nalishlarni shakllantirish va mamlakat turistik salohiyatini mustahkamlash borasida olib borilayotgan ishlar qayd etildi.

Alohida e’tibor kinoturizmni rivojlantirish va xorijiy kinokompaniyalar bilan hamkorlikka qaratildi. Mamlakatning madaniy merosini targ‘ib qilish va O‘zbekistonda suratga olish ishlarini jalb etishga qaratilgan «tax rebate» hamda «Film in Uzbekistan» loyihalari taqdim etildi. Shu munosabat bilan serbiya tomoni Netflix va boshqa xalqaro kinostudiyalar bilan ishlash tajribasi bilan o‘rtoqlashdi, bu esa O‘zbekistonda kinoturizmni rivojlantirish uchun foydali yo‘nalish bo‘lib xizmat qiladi.

Bundan tashqari, turizm sohasida qo‘shma loyihalarni amalga oshirishga, jumladan PR-kampaniyalar va OAV hamda blogerlar uchun infoturlar tashkil etishga tayyorlik bildirildi. Mehmonlar Islom sivilizatsiyasi markazi kabi turistik obyektlarni yaratish bo‘yicha O‘zbekiston tajribasiga qiziqish bildirdilar va o‘z hududlarida shunga o‘xshash loyihalarni amalga oshirish uchun o‘zbek mutaxassislarini jalb etish istagini bildirdilar.

Uchrashuv yakunida tomonlar O‘zbekiston va Serbiya o‘rtasida turizm hamda madaniy almashinuv sohasida hamkorlikning yuqori salohiyatini ta’kidlab, kinoturizm, PR-kampaniyalar va infoturlar yo‘nalishida qo‘shma loyihalarni amalga oshirishga kelishib oldilar. Bu esa har ikki mamlakatni xalqaro maydonda jozibador turistik yo‘nalish sifatida targ‘ib qilish uchun yangi imkoniyatlar ochadi.