Xitoyning “China Eastern” aviakompaniyasi Toshkent va Shanxayni to‘g‘ridan-to‘g‘ri havo qatnovi bilan bog‘ladi
2026-03-31 10:15:00 / Yangiliklar
30-mart kuni mahalliy vaqt bilan soat 18:00 da “China Eastern Airlines” aviakompaniyasining Shanxaydan MU6037 birinchi reysi Toshkent xalqaro aeroportiga qo‘ndi. Bortida 265 yo‘lovchi bo‘lgan samolyot an’anaga ko‘ra suv arkasi bilan, ekipaj esa gullar va bayramona kayfiyat bilan kutib olindi. Shuningdek, poytaxt aeroportida Toshkentdan Shanxayga birinchi yo‘lovchilarni ro‘yxatdan o‘tkazish tantanali ravishda ochildi.
Ushbu yo‘nalishning ochilishi Xitoyning eng yirik megapolisini O‘zbekiston poytaxti bilan bevosita bog‘lab, yo‘lovchilarga sayohat qilish, turizmni rivojlantirish va ishbilarmonlik aloqalarini yo‘lga qo‘yish uchun yangi imkoniyatlar yaratadi. Parvozlar qulay Airbus A330 rusumli samolyotlarda haftasiga to‘rt marta — dushanba, seshanba, payshanba va shanba kunlari amalga oshiriladi. Parvoz vaqti taxminan 8 soatni tashkil etadi.
China Eastern Airlines — 1988-yilda tashkil etilgan, bosh qarorgohi Shanxayda joylashgan Xitoyning yetakchi aviakompaniyalaridan biridir. Eslatib o‘tamiz, Xitoy aviatashuvchisi O‘zbekiston bozoriga ilk bor o‘tgan yilning iyul oyida kirib kelgan va yo‘lovchilar orasida ommalashgan Sian — Toshkent — Sian yo‘nalishini yo‘lga qo‘ygan edi.