O‘zbekiston Respublikasi Turizm qo‘mitasi

23-29 mart kunlari poytaxtimizda Xalqaro narda federatsiyasi (International Backgammon Federation - IBF) tomonidan tashkil etilgan “Asian Grand Prix 2026” xalqaro turniri nafaqat sport tadbiri, balki O‘zbekistonda MICE-turizmini rivojlantirishda muhim omil sifatida namoyon bo‘lmoqda.

Turnir ochilish marosimida O‘zbekiston Respublikasi Turizm qo‘mitasi raisi Abdulaziz Aqqulov so‘zga chiqib, bunday xalqaro musobaqalarni o‘tkazish intellektual o‘yinlarni ommalashtirish va xalqlar o‘rtasidagi do‘stlikni mustahkamlashda muhim ekanini ta’kidladi. U “Asian Grand Prix 2026” xalqaro turnirining Toshkentda o‘tkazilishi MICE-turizmini rivojlantirish, xorijiy mehmonlarni jalb etish va O‘zbekistonda xalqaro tadbirlarni yuqori darajada tashkil etish imkoniyatini yaratishini qayd etdi.

Shuningdek, IBF prezidenti Umar Kremlyov (video murojaat orqali), O‘zbekiston sport vaziri o‘rinbosari Avazjon Karimov hamda Xalqaro kurash federatsiyasi vitse-prezidenti Ravshan Dastirov ham kirish so‘zlari bilan qatnashdilar.

Turnirda 60 dan ortiq davlatdan, jumladan, Rossiya, Argentina, Xitoy, Turkiya, AQSh, Italiya va boshqa mamlakatlardan 700 dan ziyod o‘yinchilar va xorijiy mehmonlar ishtirok etmoqda. Yuqori darajadagi hakamlikni 24 nafar xalqaro hakam ta’minlamoqda.

Turnir 180 dan ortiq o‘yin stollari bilan jihozlangan zamonaviy AXELON markazida bo‘lib o‘tmoqda. Dasturga 12 ta yo‘nalish kiradi — bu turdagi musobaqalar uchun rekord ko‘rsatkich hisoblanadi. Tomoshabinlar uchun to‘g‘ridan-to‘g‘ri translyatsiyalar va to‘liq media hamrohlik tashkil etilgan.

Shu bilan birga, “Asian Grand Prix 2026” kabi yirik tadbirlar infratuzilma, mehmonxona xo‘jaligi, transport va xizmat ko‘rsatish sohalarining rivojlanishiga turtki beradi. Ishtirokchilar va mehmonlar uchun yaratilgan sharoitlar O‘zbekistonning zamonaviy va ochiq turizm yo‘nalishi ekanligini yana bir bor namoyon etadi.