MITT 2026 doirasida O‘zbekiston va Rossiya turoperatorlari o‘rtasida hamkorlikni kengaytirish masalalari muxokama etildi
2026-03-13 19:10:00 / Yangiliklar
MITT 2026 xalqaro turizm ko‘rgazmasining ishbilarmonlik dasturi doirasida O‘zbekiston Respublikasi Turizm qo‘mitasi raisi o‘rinbosari S. Tadjiyevning Rossiya turizm sanoati ittifoqi prezidenti Ilya Umanskiy bilan uchrashuvi bo‘lib o‘tdi.
Uchrashuv davomida Rossiya turistik bozori O‘zbekiston uchun asosiy bozorlardan biri bo‘lib qolayotgani ta’kidlandi. Tomonlar o‘zaro sayyohlik qatnovlarining barqaror o‘sayotganini qayd etdilar. O‘zbekiston fuqarolarining Rossiya Federatsiyasi hududlari bo‘ylab sayohat qilishga qiziqishi ortib borayotgani alohida e’tirof etilib, bu ikki mamlakat turoperatorlari uchun yangi imkoniyatlar ochayotgani aytib o‘tildi.
Muzokaralar ishtirokchilari turoperatorlar o‘rtasidagi hamkorlikni kengaytirish, jumladan, yangi turistik mahsulotlar va yo‘nalishlar ishlab chiqish hamda B2B-uchrashuvlarini faollashtirish zarurligi borasida yakdil fikrga keldilar.