O‘zbekiston Respublikasi Turizm qo‘mitasi

Uchrashuv davomida O‘zbekistonning turistik salohiyatini xalqaro bozorlarda keng targ‘ib qilish, mamlakatning tarixiy shaharlari, madaniy merosi va zamonaviy turistik infratuzilmasini global auditoriyaga yetkazish masalalari muhokama qilindi. Shuningdek, Expedia Group’ning zamonaviy marketing texnologiyalari va analitik imkoniyatlaridan foydalangan holda milliy turistik mahsulotlarni xalqaro onlayn bronlash platformalari orqali ilgari surish yuzasidan fikr almashildi.

Muzokaralar chog‘ida AQSH fuqarolari uchun O‘zbekistonga viza tartibining bekor qilingani mamlakatga amerikalik sayyohlar oqimini oshirish uchun qo‘shimcha imkoniyat yaratayotgani alohida ta’kidlandi. Milliy turistik xizmatlar — mehmonxona joylashtirish, sayohat paketlari va mahalliy turoperatorlar takliflarini Expedia Group platformalariga bosqichma-bosqich integratsiya qilish masalalari ko‘rib chiqildi. Tomonlar, shuningdek, Expedia Group’ning global media va marketing imkoniyatlaridan foydalangan holda O‘zbekistonning turistik jozibadorligini xalqaro miqyosda targ‘ib qilishga qaratilgan qo‘shma PR-kampaniyalarni amalga oshirish yuzasidan dastlabki kelishuvga erishdilar.

“Amadeus Group” kompaniyasi prezidenti Yan Tisserg bilan bo‘lib o‘tgan muzokaralarda O‘zbekistonga kiruvchi turizmni rivojlantirishda global bronlash tizimlari ma’lumotlaridan foydalanish, aviayo‘nalishlar analitikasi orqali turistik trendlarni aniqlash hamda asosiy Yevropa bozorlarida qo‘shma marketing kampaniyalarini amalga oshirish masalalari muhokama qilindi.

Muzokaralar yakunida “Amadeus for Destinations” tashabbusi doirasida Germaniya, Buyuk Britaniya, Polsha, Italiya va Ispaniya bozorlariga qaratilgan qo‘shma marketing kampaniyasi orqali O‘zbekiston turistik brendini raqamli targ‘ib qilish bo‘yicha dastlabki kelishuvga  erishildi.