O‘zbekiston Respublikasi Turizm qo‘mitasi

Jumladan, Germaniya Federal hukumati iqtisodiyot va turizm masalalari bo‘yicha vakili, Bundestag deputati Kristof Ploss bilan bo‘lib o‘tgan uchrashuvda O‘zbekiston va Germaniya o‘rtasida turizm sohasida institutsional hamkorlikni rivojlantirish, turistik almashinuvlar uchun qulay shart-sharoitlar yaratish, shuningdek nemis turistik kompaniyalarining O‘zbekiston bozoridagi ishtirokini kengaytirish masalalari muhokama qilindi.

Yevropa hududidagi Turk-islom birligi tashkiloti rahbari Ali Pasha Akbash bilan o‘tkazilgan muzokaralarda O‘zbekistonning ziyorat turizmi salohiyatini Yevropa mamlakatlaridagi musulmon jamoalari orasida keng targ‘ib qilish, mamlakatning islomiy va madaniy merosini ommalashtirish hamda tashkilotning madaniy markazlarida O‘zbekistonga bag‘ishlangan tematik tadbirlar va taqdimotlar o‘tkazish imkoniyatlari ko‘rib chiqildi. Shuningdek, Yevropa davlatlaridan ziyorat turizmi yo‘nalishidagi turistlar oqimini oshirish, qo‘shma tadbirlar tashkil etish hamda tashkilot a’zolari va OAV vakillari uchun O‘zbekistonga press-tur uyushtirish bo‘yicha kelishuvga erishildi.

“Private Palace Hotels & Resorts” kompaniyasi asoschisi va boshqaruvchi direktori Jino Leonard bilan uchrashuvda O‘zbekistonda mehmonxona infratuzilmasini rivojlantirishga xalqaro operatorlarni jalb qilish, jumladan premium va kurort turizmi segmentlarida hamkorlikni kengaytirish masalalari muhokama qilindi. Shuningdek, Samarqand, Buxoro va Xiva shaharlaridagi tarixiy binolarni butik-mehmonxonalar sifatida renovatsiya qilish hamda wellness va tibbiy turizm yo‘nalishlarini rivojlantirish masalalari muhokama qilindi.

Shuningdek, “Turkish Airlines” aviakompaniyasi vitse-prezidenti Ahmet Harun Basturk bilan uchrashuvda O‘zbekistonning turistik salohiyatini xalqaro miqyosda targ‘ib qilish, mamlakatga kiruvchi turistik oqimni oshirish hamda aviaqatnovlar orqali turizmni rag‘batlantirish masalalari muhokama qilindi. Xususan, “Turkish Airlines” xalqaro kommunikatsiya kanallari orqali yo‘nalishni qo‘shma targ‘ib qilish, turistik biznes bilan hamkorlikni kuchaytirish, marshrutlar tarmog‘ini kengaytirish va parvozlar chastotasini oshirish imkoniyatlari ko‘rib chiqildi. Uchrashuv yakunida, Turizm qo‘mitasi va “Turkish Airlines” o‘rtasida hamkorlik to‘g‘risidagi memorandumni imzolash, shuningdek Yevropa, AQSH, Lotin Amerikasi va Avstraliya mamlakatlarida O‘zbekiston uchun ustuvor hisoblangan bozorlarda turoperatorlar, sohaviy uyushmalar va ommaviy axborot vositalari ishtirokida roud-shoular hamda B2B uchrashuvlarini tashkil etish bo‘yicha kelishuvga erishildi.