O‘zbekiston Respublikasi Turizm qo‘mitasi

“Rivojlanayotgan yo‘nalishlarning imkoniyatlarini kengaytirish: salohiyatdan samaradorlikka” mavzusidagi sammit rivojlanayotgan turizm yo‘nalishlari salohiyatini transformatsiya qilishga bag‘ishlandi.

Sammit UN Tourism tashkilotiga a’zo davlatlar turizm vazirlari uchun sohaning barqaror o‘sishini, mamlakatlar va mintaqalarga iqtisodiy foyda keltirishni, shuningdek, madaniy va tabiiy merosni saqlashni ta’minlaydigan strategiyalarni ishlab chiqish hamda amaliy tajriba almashish bo‘yicha yuqori darajadagi platforma bo‘lib xizmat qildi.

Muhokamalar markazida turizmni boshqarish modellarini takomillashtirish va idoralararo to‘siqlarni bartaraf etish, investitsiyalarni jalb qilish, mehnat bozori o‘zgarayotgan sharoitda inson kapitalini rivojlantirish va kadrlar tayyorlash, davlat-xususiy sherikligini mustahkamlash, barqarorlik va raqobatbardoshlikni oshirish maqsadida turizm yo‘nalishlarini diversifikatsiya qilish kabi asosiy masalalar turdi.

Sammit ishida O‘zbekiston Respublikasi Turizm qo‘mitasi raisi A. Aqqulov ishtirok etdi. U o‘z nutqida ishtirokchilarga mamlakatimizda turizm sohasida amalga oshirilayotgan islohotlar, strategik investitsiyaviy ustuvorliklar, hududiy yo‘nalishlarni rivojlantirish hamda sohaning barqaror o‘sishi uchun qulay institutsional muhit yaratish bo‘yicha ko‘rilayotgan choralar haqida ma’lumot berdi. Mahalliy hamjamiyatlarni jalb etish, infratuzilmani modernizatsiya qilish va turistik xizmatlar sifatini oshirish masalalariga alohida e’tibor qaratildi.

Sammitning xalqaro ahamiyati sohaning global miqyosda o‘zgarishi sharoitida turizmni rivojlantirishga doir kelishilgan yondashuvlarni shakllantirishdan iboratdir.

ITB Berlin platformasi an’anaviy tarzda jahon turizm bozorining asosiy ishtirokchilarini birlashtiradi, vazirlar darajasidagi format esa uzoq muddatli rivojlanish, investitsiyaviy barqarorlik va turizmning milliy iqtisodiyotga qo‘shadigan hissasini oshirishga qaratilgan yechimlarni ishlab chiqish imkonini beradi.

Bu kabi uchrashuvlarni o‘tkazish yanada barqaror, inklyuziv va raqobatbardosh global turizm tizimini yaratishga yordam berib, kelgusidagi xalqaro hamkorlik, siyosatni muvofiqlashtirish va ilg‘or tajriba almashish uchun zamin yaratadi.