O‘zbekiston Respublikasi Turizm qo‘mitasi

Tashrif doirasida Respublika ishchi guruhi Konimex tumani “Yangiqazg‘an” ovuliga tashrif buyurib, hududni “turizm ovuli”ga aylantirish bo‘yicha istiqbolli loyihalar taqdimoti bilan tanishdi. Unda Konimex tumanining bugungi turizm salohiyati, rejalashtirilayotgan yangi loyihalar hamda turizm infratuzilmasini rivojlantirishga qaratilgan tashabbuslar muhokama qilindi.

Shuningdek, ishchi guruh a’zolari Nurota tumanida bo‘lib, hududning tarixiy-madaniy obidalari, tabiiy-rekreatsion zonalari, ziyorat va ekoturizm yo‘nalishlaridagi imkoniyatlari, mavjud infratuzilma holati hamda istiqbolli loyihalar yuzasidan taqdimotda ishtirok etdi. Taqdimot davomida yangi turizm yo‘nalishlarini shakllantirish, servis xizmatlarini kengaytirish, oilaviy mehmon uylari faoliyatini rivojlantirish va mahalliy aholi bandligini ta’minlash masalalariga alohida e’tibor qaratildi.

Bundan tashqari, Respublika ishchi guruhi tomonidan Nurota tumanida joylashgan tarixiy korizlar ko‘zdan kechirildi. Nurota hududi Markaziy Osiyodagi eng qadimiy korizlar joylashgan hududlardan biri hisoblanib, “Maston”, “Zulm”, “Zulfiqor” kabi korizlar asrlar davomida aholini suv bilan ta’minlab kelgan. Xususan, Nurfaxr MFY hududidagi korizni turizm maskaniga aylantirish loyihasi taqdim etilib, loyiha doirasida tarixiy merosni asrash, yangi ish o‘rinlari yaratish, avtoturargoh, savdo va xizmat ko‘rsatish obyektlari, tomosha maydonchalari hamda sanitariya shaxobchalarini barpo etish rejalari belgilandi.

Shuningdek, Xatirchi tumanidagi Langar va Angidon turizm mahallalarida oilaviy mehmon uylarini tashkil etish, hamda Oltinsay mahallasida tibbiyot turizmini rivojlantirish bo‘yicha zarur ko‘rsatmalar berildi. Bu tashabbuslar hududlarda turizm salohiyatini kengaytirish, mahalliy aholi bandligini ta’minlash va turistik xizmatlar sifatini oshirishga qaratilgan.

Tashrif doirasida viloyatda faoliyat yuritayotgan 50 dan ortiq tadbirkorlar, turoperatorlar, hunarmandlar, mehmonxona va restoranlar, transport xizmatlari hamda muzeylar vakillari ishtirokida tadbirkorlar bilan ochiq muloqot ham tashkil etildi. Unda Iqtisodiyot va moliya, Transport, Kambag‘allikni qisqartirish va bandlik vazirliklari, Madaniy meros agentligi, O‘rmon va yashil hududlarni ko‘paytirish hamda cho‘llanishga qarshi kurashish agentligi, Navoiy viloyati hokimligi va boshqa tegishli idoralar vakillari qatnashdi.

Ochiq muloqot davomida safari turizmi, ekoturizm, ziyorat, tarixiy-madaniy, gastronomik va hunarmandchilik turizmi yo‘nalishlarida mavjud imkoniyatlardan samarali foydalanish, turizm infratuzilmasini takomillashtirish hamda xizmatlar sifatini oshirish masalalari muhokama qilindi. Respublika ishchi guruhi rahbari A.Aqqulov tomonidan o‘tkazilgan taqdimotda Navoiy viloyatida 2025-yilda amalga oshirilgan ishlar hamda 2026-yilga mo‘ljallangan ustuvor vazifalar atroflicha yoritildi.

Tadbirlar yakunida bildirilgan taklif va tavsiyalar asosida Navoiy viloyatida turizm sohasini yanada rivojlantirish bo‘yicha aniq vazifalar va chora-tadbirlar belgilab olindi.

Keyingi uchrashuv 6-fevral kuni Jizzax viloyati Jizzax shahri “Zafaron” mehmonxonasida (Bobur MFY, I.Karimov shoh ko‘chasi 79-uy) bo‘lib o‘tadi. (Uchrashuv yuzasidan qo‘shimcha ma’lumot: Fayoz Kushakov (99)858-43-86).

Mazkur uchrashuvga quyidagi havola orqali ro‘yxatdan o‘ting.