O‘zbekiston Respublikasi Turizm qo‘mitasi

O‘zbekiston Respublikasi Turizm qo‘mitasi raisi Davlat rahbari tashabbusi bilan so‘nggi yillarda turizm sohasida amalga oshirilayotgan tizimli islohotlar, sohaga investitsiyalarni jalb etish, xususiy sektorni qo‘llab-quvvatlash hamda normativ-huquqiy bazani takomillashtirish maqsadida joriy yilning 1-2-fevral kunlari Buxoro viloyatida bo‘lib, hududda amalga oshirilayotgan va istiqbolli turizm loyihalari bilan tanishdi. Shuningdek, viloyatdagi salohiyatli turizm mahsulotlarini tashkil etish va infratuzilmani yaxshilash bo‘yicha o‘rganishlar o‘tkazildi.

Viloyatda faoliyat yuritayotgan turizm sohasi vakillari bilan tashkil etilgan uchrashuvda Iqtisodiyot va moliya, Transport, Kambag‘allikni qisqartirish va bandlik vazirliklari, Madaniy meros agentligi, O‘rmon va yashil hududlarni ko‘paytirish hamda cho‘llanishga qarshi kurashish agentligi, Buxoro viloyati hokimligi hamda tegishli vazirlik va idoralar vakillaridan iborat respublika ishchi guruhi ishtirok etdi. Ochiq muloqot tarzida o‘tkazilgan tadbirda 60 dan ortiq tadbirkorlar, turoperatorlar, gidlar, turagentlar, hunarmandlar, mehmonxonalar, restoranlar, transport xizmatlari, madaniy meros obyekti va muzeylar vakillari qatnashdi.

Yig‘ilish davomida Buxoro viloyatida turizmni yanada rivojlantirish, xususan, ziyorat, tarixiy-madaniy, gastronomik va hunarmandchilik turizmi yo‘nalishlarida mavjud salohiyatdan samarali foydalanish, turizm infratuzilmasini takomillashtirish hamda xizmatlar sifatini oshirish masalalari muhokama qilindi.

Respublika ishchi guruhi rahbari O‘zbekiston Respublikasi Turizm qo‘mitasi raisi A.Aqqulov tomonidan o‘tkazilgan taqdimotda Buxoro viloyatida 2025-yilda amalga oshirilgan ishlar hamda 2026-yilga mo‘ljallangan ustuvor vazifalar atroflicha yoritildi. Xususan, Buxoro shahrining tarixiy markazi, YUNESKO ro‘yxatiga kiritilgan obidalar, ziyorat maskanlari va milliy hunarmandchilik an’analari asosida yangi turistik mahsulotlarni yaratish uchun keng imkoniyatlar mavjudligi ta’kidlandi.

Uchrashuvda ishtirok etgan turizm sohasi vakillari davlat tomonidan berilayotgan imtiyozlar, subsidiyalar va grant dasturlari sohaning barqaror rivojiga xizmat qilayotganini qayd etdilar. Shu bilan birga, mahalliy tadbirkorlar tomonidan ilgari surilgan taklif va tashabbuslar turizm sohasida davlat va xususiy sektor o‘rtasidagi sheriklikni yanada mustahkamlashga qaratilgani bilan ahamiyatli bo‘ldi.

Muloqot yakunida Buxoro viloyatida turizm sohasini hududlar kesimida samarali rivojlantirish, viloyatning turistik imidjini xalqaro miqyosda targ‘ib etish hamda aholining turmush darajasini oshirishga xizmat qiladigan loyihalarni qo‘llab-quvvatlash bo‘yicha aniq vazifalar belgilab olindi. Bunday uchrashuvlar Buxoro viloyatining boy turizm salohiyatini to‘liq ro‘yobga chiqarishga xizmat qilishi ta’kidlandi.

Keyingi uchrashuv 4-fevral kuni Navoiy viloyati Navoiy shahri “Zarafshon Grand” mehmonxonasida (Me’morlar 6 uy) bo‘lib o‘tadi. (Uchrashuv yuzasidan qo‘shimcha ma’lumot: Shaxzod Sadinov (93)085-58-77).

Mazkur uchrashuvga quyidagi havola orqali ro‘yxatdan o‘ting.