O‘zbekiston xalqaro sayyohlar e’tiborini tortmoqda
2026-02-02 15:10:00 / Yangiliklar
Materialda O‘zbekistonning bo‘lajak “Danish Travel Show 2026” ko‘rgazmasida ishtirok etishi haqida so‘z yuritilib, unda mamlakat o‘zining turistik imkoniyatlarini namoyish etishi, zamonaviy sayohatchilar uchun dam olish qanchalik xavfsiz, qulay va rang-barang bo‘lishi mumkinligini xorijiy auditoriyaga ko‘rsatishi qayd etilgan.
Nashr yozishicha, tarixan Buyuk Ipak yo‘lining markazi sifatida tanilgan O‘zbekiston boy turistik salohiyatga ega istiqbolli yo‘nalish sifatida skandinaviyalik sayyohlar va turizm sohasi mutaxassislarining e’tiborini tobora ko‘proq jalb qilmoqda.
Maqolada O‘zbekistonning boy tarixiy merosi, an’analari va betakror me’morchiligi haqida so‘z yuritilib, ular Shimoliy Yevropadan kelayotgan mehmonlar uchun chuqur va autentik sayyohlik tajribasini yaratib berishi ta’kidlanadi. Afsonaviy Samarqand, Buxoro va Xiva shaharlari sayohatchilarni nafaqat o‘z yodgorliklari, balki hunarmandchilik, kundalik hayot va mamlakatning o‘ziga xos muhitini yaqindan his qilish imkoniyati bilan ham o‘ziga jalb etib, safarni yanada mazmunli va unutilmas qiladi.
Mazkur nashr O‘zbekistonning zamonaviy, xavfsiz va rang-barang turistik yo‘nalish sifatida xalqaro auditoriya orasida qiziqishi ortib borayotganini aks ettiradi. Bunday e’tibor milliy turistik salohiyatni yirik xalqaro maydonlarda targ‘ib qilishga xizmat qilib, xorijiy bozorlarda mamlakatning ijobiy imijini mustahkamlaydi hamda uni turli toifadagi sayohatchilar uchun jozibador yo‘nalish sifatida namoyon etadi.