O‘zbekiston Respublikasi Turizm qo‘mitasi

Davlatimiz rahbari tashabbusi bilan turizm sohasida amalga oshirilayotgan islohotlarni yanada ilgari surish, investitsiyalarni jalb etish, tadbirkorlikni qo‘llab-quvvatlash va normativ-huquqiy bazani takomillashtirish maqsadida joriy yilning 29–30-yanvar kunlari O‘zbekiston Respublikasi Turizm qo‘mitasi raisi Xorazm viloyatiga tashrif buyurdi.

Tashrif davomida u hududdagi mavjud va istiqbolli turistik loyihalar bilan tanishib, shuningdek, turizm sohasi vakillari bilan ochiq muloqot formatida uchrashuv o‘tkazdi. Uchrashuvda respublika ishchi guruhi vakillari, shuningdek, soha bo‘yicha qariyb 150 nafar ishtirokchi — tadbirkorlar, turoperatorlar, hunarmandlar, gidlar, mehmonxona va restoran egalari, transport kompaniyalari vakillari va boshqalar qatnashdi.

Tadbirga Qoraqalpog‘iston Respublikasi turizm sohasi tadbirkorlari jamoalari ham ishtirok etib, hududlarni o‘zaro hamkorlikda rivojlantirish masalalari muhokama qilindi.

Muloqot chog‘ida ishtirokchilar hududda turizmni rivojlantirishning dolzarb masalalari, Xorazmning boy madaniy va tarixiy salohiyatidan samarali foydalanish, infratuzilmani takomillashtirish hamda turistik xizmatlar sifatini oshirish yuzasidan fikr almashdilar.

Qo‘mita raisi A. Aqqulov 2025-yil yakunlari bo‘yicha faoliyat natijalarini taqdim etib, 2026-yilga mo‘ljallangan ustuvor yo‘nalishlarni belgilab berdi. Ta’kidlanishicha, boy meros va noyob an’analarga ega hudud uchun madaniy-ma’rifiy, gastronomik va oilaviy turizmni rivojlantirish istiqbolli yo‘nalish hisoblanadi. Ishtirokchilar amaldagi davlat qo‘llab-quvvatlash choralari — imtiyozlar, subsidiyalar va grant dasturlari sohaning barqaror rivojlanishiga xizmat qilayotganini qayd etdilar.

Shuningdek, yangi turistik yo‘nalishlarni yaratish, infratuzilmani yaxshilash hamda davlat tuzilmalari va xususiy sektor o‘rtasidagi hamkorlikni mustahkamlash bo‘yicha takliflar ilgari surildi. Ikki hudud vakillari sayyohlar sonini oshirishdagi asosiy muammolardan biri bu transport logistikasi ekanligini qayd etib, aviaqatnovlar sonini oshirish, yo'l infratuzilmasini yaxshilash hamda yo'l bo'ylarida SGSh larini tashkil qilish muhimligini bildirishdi.

Yakunda Xorazm viloyatining turistik salohiyatini ichki va xalqaro miqyosda targ‘ib etish, shuningdek, aholining turmush sifatini oshirishga qaratilgan tashabbuslarni amalga oshirish bo‘yicha keyingi qadamlar belgilab olindi. Ishtirokchilar bunday tadbirlarning dolzarbligini ta’kidlab, ular turizmni rivojlantirish sohasida samarali muloqot va qo‘shma yechimlar ishlab chiqish uchun muhim maydon bo‘lib xizmat qilayotganini qayd etdilar.

Navbatdagi uchrashuv 2-fevral kuni Buxoro shahrida, “RAMADA ENCORE BY WYNDHAM” mehmonxonasida (Buxoro shahri, Yangiobod MFY, G‘ijduvon ko'chasi, 47-uy) bo‘lib o‘tadi. Uchrashuv bo‘yicha qo‘shimcha ma’lumot: G‘olib Kenjayev — +99897 855-54-11.

Mazkur uchrashuvga quyidagi havola orqali ro‘yxatdan o‘ting.