O‘zbekiston Respublikasi Turizm qo‘mitasi

Malayziyaning Kuala-Lumpur shahrida bo‘lib o‘tgan taqdirlash marosimida O‘zbekiston Respublikasi Turizm qo‘mitasi hamda mamlakatimizning Malayziyadagi elchixonasi vakillari ishtirok etdi.

E’tirofga ko‘ra, O‘zbekistonda joylashgan Samarqand, Buxoro, Xiva va Shahrisabz shaharlari YUNESKO tomonidan tan olingan islomiy tarixiy shaharlar hisoblanadi. Bu ko‘rsatkich O‘zbekistonni Osiyoda islom sivilizatsiyasining eng boy va yaxlit saqlangan markazlaridan biri sifatida namoyon etmoqda.

Buyuk Ipak yo‘lining qoq markazida joylashgan O‘zbekiston asrlar davomida islom olamining madaniyat, ilm-fan va ma’naviy an’analari chorrahasi bo‘lib kelgan. Uning tarixiy shaharlarida islom me’morchiligi, shaharsozlik va ilmiy tafakkurning yuksak namunalarini — masjidlar, madrasalar, maqbaralar hamda yaxlit shahar ansambllarini bugungi kungacha asl muhitda ko‘rish mumkin. Aynan shaharlarning kompleks tarzda saqlanib qolganligi, alohida yodgorliklar emas, balki butun tarixiy muhitning yaxlitligi ushbu merosni chinakam noyob qiladi.

Me’moriy meros bilan bir qatorda, O‘zbekiston bugungi kunda ham ziyorat va madaniy turizmning muhim markazi bo‘lib qolmoqda. Toshkentdagi Hast-Imom majmuasi, Samarqanddagi Imom al-Buxoriy maqbarasi, Buxorodagi Bahouddin Naqshband va Chashmai Ayyub majmualari, shuningdek Termizdagi islomiy yodgorliklar butun dunyodan kelayotgan ziyoratchilar va sayyohlarni o‘ziga jalb etishda davom etmoqda.

Xalqaro maydonda mamlakat turizm sohasi vakillari tomonidan qabul qilingan ASIA Records mukofoti O‘zbekistonning islomiy tarixiy merosni asrash, rivojlantirish va targ‘ib etish borasidagi yetakchiligini, shuningdek ushbu merosning butun insoniyat uchun umuminsoniy qadriyatga ega ekanini e’tirof etadi.