O‘zbekistonning turizm salohiyati Ispaniyada o‘tkazilayotgan “FITUR” ko‘rgazmasida namoyish etilmoqda
2026-01-24 10:40:00 / Yangiliklar
“FITUR” (Feria Internacional de Turismo) dunyodagi eng yirik va nufuzli xalqaro turizm ko‘rgazmalaridan biri bo‘lib, 1981-yildan buyon har yili Madrid shahrida tashkil etib kelinadi. Bugungi kunda u global turizm bozorining yetakchi professional platformalaridan biriga aylangan.
Joriy yilda ko‘rgazmada 160 dan ortiq davlat vakillari hamda 10 mingdan ziyod kompaniyalar ishtirok etishmoqda. Tadbir turizm sohasida innovatsiyalarni rivojlantirish, barqarorlikni ta’minlash va xalqaro hamkorlikni mustahkamlashga qaratilgan.
Mazkur ko‘rgazmada Turizm qo‘mitasi delegatsiyasi 10 nafar yetakchi turoperatorlar bilan birgalikda ishtirok etib, mamlakatimizning boy madaniy merosi, turistik salohiyati va zamonaviy sayyohlik mahsulotlarini xalqaro hamjamiyatga keng namoyish etmoqda.
“FITUR” ko‘rgazmasi doirasida xalqaro turoperatorlar, aviakompaniyalar, yetakchi media kompaniyalar va investorlar bilan B2B uchrashuvlar, hamkorlik bo‘yicha muzokaralar o‘tkazilmoqda. Shuningdek, O‘zbekiston turizm brendini targ‘ib qilish va xorijiy sayyohlar oqimini oshirishga qaratilgan taqdimotlar tashkil etilmoqda.
Ko‘rgazma yakunida erishilgan natijalar asosida yangi hamkorlik aloqalarini yo‘lga qo‘yish hamda xalqaro bozorda O‘zbekistonning turistik imidjini yanada mustahkamlash kutilmoqda.