Britaniyaning “The Telegraph” gazetasi Xiva haqida maqola e’lon qildi
2026-01-12 12:30:00 / Yangiliklar
Maqola muallifi, britaniyalik jurnalist Joel Deyning ta’kidlashicha, Xivaning yoshi 2,5 ming yildan oshadi, Qoraqum va Qizilqum sahrolari chegarasida joylashgani esa shaharga o‘ziga xos muhit bag‘ishlaydi.
Materialda Xiva Buyuk Ipak yo‘lining muhim nuqtalaridan biri bo‘lgani qayd etilib, O‘zbekistonda amalga oshirilayotgan yangi temiryo‘l loyihasi shaharning sayyohlik jozibadorligini sezilarli darajada oshirishi va uni mamlakatdagi eng ko‘p tashrif buyuriladigan tarixiy markazlar qatoriga olib chiqishi mumkinligi ta’kidlanadi.
Maqolada aytilishicha, Xivaning Ipak yo‘li yodgorligi sifatidagi beqiyos ahamiyatiga qaramay, hozircha bu yerga keluvchi sayyohlar oqimi Samarqand va Buxoro kabi shaharlarga nisbatan kamroq. Biroq Toshkent–Xiva yo‘nalishida yangi tezyurar temiryo‘l qatnovi ishga tushirilishi bilan vaziyat o‘zgarishi mumkin. Mazkur loyiha yo‘l vaqtini taxminan 15 soatdan 7 soatgacha qisqartiradi va muallif fikricha, bu qadam shaharning kelajagini tubdan o‘zgartirishga qodir.
Ta’kidlanishicha, Xivaning asosiy me’moriy yodgorliklari qal’a devorlari ichida joylashgan Ichan-Qal’a hududida jamlangan bo‘lib, u noyob ochiq osmon ostidagi muzey majmuasi hisoblanadi. G‘arbiy darvoza orqali kirishda mehmonlarning e’tiborini darhol XIX asr o‘rtalarida barpo etilgan Muhammad Aminxon madrasasi tortadi.
Joel Dey Kunya-Ark me’morchiligiga ham batafsil to‘xtalib, binolar fasadlaridagi chuqur ravoqlar va murakkab geometrik naqshlarni alohida ta’kidlaydi.
Maqolada shuningdek shaharning boshqa muhim obidalari — Kunya-Ark oldidagi maydon, Muhammad Rahimxon madrasasi va Juma masjidi ham tilga olinadi. X asrda qurilgan Juma masjidi ilk islomiy me’morchilikning noyob namunasi bo‘lib, to‘g‘ri to‘rtburchak shakldagi bino 200 dan ortiq yog‘och ustunlarga tayanadi, ularning ayrimlari ming yillik tarixga ega.
Jurnalist fikricha, Xiva piyoda sayr qilish uchun juda qulay shahar, chunki barcha asosiy diqqatga sazovor joylar bir-biriga yaqin masofada joylashgan.
Maqola yakunida Joel Dey London–Toshkent yo‘nalishida to‘g‘ridan-to‘g‘ri aviareyslar mavjudligini qayd etib, Toshkentdan Xivaga tezyurar poyezd orqali yetib borish mumkinligini eslatadi. Shuningdek, muallif Xivadagi mehmonxonalar bo‘yicha tavsiyalar berib, taxminiy narxlarni keltiradi va bron qilish yuzasidan maslahatlar bilan o‘rtoqlashadi.