O‘zbekiston Respublikasi Turizm qo‘mitasi

“Yoshlar turizmi haftaligi” O‘zbekiston Respublikasi Prezidentining 2022-yil 30-apreldagi “Ichki turizm xizmatlarini diversifikatsiya qilishga oid qoʻshimcha chora-tadbirlar toʻgʻrisida”gi PQ-232-sonli qaroriga muvofiq oʻtkazilib kelinmoqda.

Haftalik doirasida tashkil etilayotgan sayohatlar yoshlarning tarixiy-madaniy merosimiz, milliy qadriyatlarimiz va yurtimizning betakror tabiat manzaralari bilan yaqindan tanishishiga xizmat qilmoqda. Shuningdek, mazkur tadbirlar orqali yoshlar o‘rtasida vatanparvarlik tuyg‘ularini mustahkamlash, sog‘lom turmush tarzini targ‘ib qilish hamda ichki turizmga bo‘lgan qiziqishni yanada oshirish maqsad qilingan.

Bundan tashqari, sayohatlar davomida ishtirokchilar uchun turli ma’naviy-ma’rifiy uchrashuvlar, madaniy tadbirlar va ko‘ngilochar dasturlar tashkil etilmoqda. Bu esa yoshlarning bo‘sh vaqtini mazmunli o‘tkazish, o‘zaro tajriba almashish va yangi do‘stlik aloqalarini o‘rnatishiga keng imkoniyat yaratmoqda.

Eslatib o‘tamiz, ushbu haftalik doirasida respublikadagi joylashtirish vositalari tomonidan 20 foizgacha chegirmalar joriy etildi. Shu bilan birga, Madaniy meros agentligi va “Vaqf” xayriya fondi tasarrufidagi ziyoratgohlarga yoshlar 10 foizlik chegirma bilan kirishi belgilandi. Shuningdek, O‘zbekiston Respublikasi Prezidentining “Teatrlarning jamiyat madaniy hayotidagi ahamiyatini oshirish va ular faoliyatini yanada qo‘llab-quvvatlash chora-tadbirlari to‘g‘risida” 2024-yil 22-noyabrdagi PQ–399-son qaroriga muvofiq, “Temir daftar”, “Ayollar daftari” va “Yoshlar daftari”ga kiritilgan fuqarolar va nogironligi bo‘lgan shaxslar davlat teatrlarining spektakllariga bepul kiritilishi belgilangan.

“Uzbekistan Airways” AJ tomonidan o‘rta maxsus, professional va oliy ta’lim muassasalari talaba (o‘quvchi)lari uchun 2025-yil 26-dekabrdan 2026-yil 11-yanvargacha amalga oshiriladigan mahalliy aviaqatnovlarda iqtisodiy toifadagi tariflaridan 50% chegirma taqdim etiladi.

Bundan tashqari, Haftalik doirasida yoshlarning ta’tilini mazmunli o‘tkazish maqsadida respublika bo‘ylab o‘tkaziladigan konsert-tomosha tadbirlari ro‘yxati shakllantirildi.

“Yoshlar turizmi haftaligi”da faol ishtirok eting – O‘zbekiston bo‘ylab sayohat qiling!