O‘zbekiston Respublikasi Turizm qo‘mitasi

Mazkur loyiha O‘zbekiston Respublikasi Turizm qo‘mitasi hamda mamlakatimizning Germaniyadagi elchixonasi hamkorligida amalga oshirildi.

Qisqa metrajli videoroliklar bir hafta davomida Berlindagi 9 ta ekranda har kuni 360–720 martadan, Dyusseldorf shahridagi 10 ta ekranda, shuningdek, Myunxen va Shtutgart shaharlarida bittadan ekranda ikki kun davomida kuniga 360 martadan namoyish etildi.

Ma’lumki, Yevropadan O‘zbekistonga tashrif buyuruvchi sayyohlarning salmoqli qismini germaniyalik turistlar tashkil etadi. Yevropaning yetakchi sayyohlik kompaniyalari va turoperatorlarining mamlakatimizga bo‘lgan qiziqishi yildan-yilga ortib borayotgani alohida e’tiborga loyiq.

Mutaxassislar fikriga ko‘ra, ushbu reklama nafaqat shahar aholisi, balki dunyoning turli mamlakatlaridan kelgan ko‘plab mehmonlar e’tiborini ham tortadi. Qolaversa, ayni davrda nemis sayyohlari kelgusi yilgi sayohatlarini faol rejalashtirayotgani ushbu tashabbus samaradorligini yanada oshiradi.

Yangi yil arafasida Germaniyaga dunyoning turli burchaklaridan ko‘plab mehmonlar tashrif buyurishini inobatga olganda, O‘zbekistonning sayyohlik salohiyatiga bag‘ishlangan videoroliklar nafaqat Germaniya fuqarolari, balki boshqa mamlakatlardan kelgan mehmonlarning ham e’tiborini tortib, ularni yurtimizga sayohat qilishga undashi kutilmoqda.