Britaniyaning “Lonely Planet” portali O‘zbekiston bo‘ylab ideal bir haftalik sayyohlik marshrutini taqdim etdi
2025-12-26 14:10:00 / Yangiliklar
Sharhda mamlakatning asosiy shaharlariga tashrif buyurish, diqqatga sazovor joylar, milliy taomlar hamda sayyohlar uchun foydali amaliy ma’lumotlarni o‘z ichiga olgan yetti kunlik batafsil safar rejasi keltirilgan.
Maqola muallifi Akanksha Singh ta’kidlashicha, O‘zbekiston ko‘pincha me’morchilikdagi moviy ranglar bilan — Buxorodagi Miri-Arab madrasasining gumbazlari, Xivadagi Kalta-Minor minorasining firuza ranglari va qadimiy shaharlar uzra musaffo osmon bilan tasavvur qilinadi. Biroq, uning so‘zlariga ko‘ra, eng katta taassurotni mamlakatning oltin va qahrabo ranglari qoldirgan: paxta dalalari, sahro manzaralari, Ayaz-Qala qal’asi yonidagi quyosh botishlari hamda Ismoil Somoniy maqbarasi fasadi.
Marshrutda Toshkent, Nukus, Xiva, Buxoro va Samarqand shaharlaridagi to‘xtash nuqtalari batafsil tasvirlangan. Hazrati Imom majmuasi, I.V. Savitskiy nomidagi Davlat san’at muzeyi, Ichan-Qal’a me’moriy ansambli, Registon maydoni va Shohi Zinda nekropoli kabi tarixiy-madaniy obidalarga alohida e’tibor qaratilgan. Shuningdek, muallif mahalliy gastronomiya, sharqona bozorlari, an’anaviy hammomlar va hunarmandchilik ustaxonalari haqidagi shaxsiy taassurotlari bilan ham o‘rtoqlashadi.
Maqolaning alohida qismi sayohatchilar uchun amaliy tavsiyalarga bag‘ishlangan: safar uchun eng qulay mavsum, transport va aloqa xususiyatlari, kiyim tanlash bo‘yicha maslahatlar hamda shaharlararo qatnovning qulay usullari, jumladan, “Afrosiyob” tezyurar poyezdlari haqida ma’lumot berilgan.
Xulosa qismida yetti kunlik sayohat O‘zbekistonning asosiy sayyohlik durdonalarini ko‘rish imkonini berishi ta’kidlanadi, biroq mamlakat madaniyati, tarixi va muhitini yanada chuqurroq his etish uchun muallif kamida o‘n kunlik safarni rejalashtirishni tavsiya etadi.