O‘zbekiston Respublikasi Turizm qo‘mitasi

Dunyoning 50 dan ortiq mamlakatidan turizm sohasi vakillari ishtirok etgan mazkur xalqaro yarmarkada O‘zbekiston Respublikasi Turizm qo‘mitasi tomonidan tashkil etilgan O‘zbekiston milliy stendida mamlakatimizning boy turizm hamda investitsiyaviy salohiyati keng jamoatchilikka taqdim etildi. Yarmarka mehmonlari yurtimizning, jumladan, Namangan, Qashqadaryo, Farg‘ona, Surxondaryo va Toshkent viloyatlarining tarixiy-madaniy merosi, muqaddas ziyoratgohlari, ekoturizm, shuningdek, sog‘lomlashtirish va dam olish turizmi yo‘nalishlari imkoniyatlari bilan yaqindan tanishdilar.

Tadbir davomida yarmarkada ishtirok etgan O‘zbekiston turizm sohasi vakillari tomonidan xorijiy turkompaniyalar va turizm assotsiatsiyalari bilan qator ikki tomonlama uchrashuvlar o‘tkazilib, mamlakatimizga sayyohlar oqimini oshirish, qo‘shma turistik mahsulotlar ishlab chiqish hamda xalqaro hamkorlikni kengaytirish masalalari yuzasidan qator kelishuvlarga erishildi.

“CITM” xalqaro turizm yarmarkasi jahon turizm bozori ishtirokchilarini birlashtiruvchi nufuzli platforma hisoblanadi. Ushbu yarmarkada ishtirok etish mamlakatimizning xalqaro turizm xaritasidagi o‘rnini yanada mustahkamlash, shuningdek, O‘zbekistonning umumiy turizm va investitsiyaviy salohiyatini keng jamoatchilikka targ‘ib etishga xizmat qilmoqda.