O‘zbekiston Respublikasi Turizm qo‘mitasi

Xususan, bayram kunlari davomida madaniy meros obyektlariga tashrif buyuruvchilar uchun kirish chiptalariga 10 foizgacha chegirmalar hamda ayrim obyektlarga esa bepul kirish rejalashtirilgan. Bu esa aholining tarixiy va madaniy merosimizga bo‘lgan qiziqishini yanada oshirishga xizmat qiladi.

Shu bilan birga, turizm sohasidagi tadbirkorlik subyektlari tomonidan mehmonxonalar, mehmon uylari va boshqa joylashtirish vositalarida ixtiyoriy ravishda 20 foizgacha maxsus bayram chegirmalari taqdim etilmoqda. Mazkur chegirmalar mahalliy va xorijiy sayyohlar uchun qulay sharoit yaratib, Yangi yil bayramini mamlakatimizning turli hududlarida maroqli o‘tkazish imkonini beradi.

Shuningdek, O‘zbekiston Respublikasi Prezidentining “Teatrlarning jamiyat madaniy hayotidagi ahamiyatini oshirish va ular faoliyatini yanada qo‘llab-quvvatlash chora-tadbirlari to‘g‘risida”gi 2024-yil 22-noyabrdagi PQ–399-son qaroriga muvofiq, “Temir daftar”, “Ayollar daftari” va “Yoshlar daftari”ga kiritilgan fuqarolar va nogironligi bo‘lgan shaxslar davlat teatrlarining spektakllariga bepul kiritilishi belgilangan.

Bundan tashqari, 2026-yilni munosib kutib olish maqsadida, Toshkent shahrida o‘tkaziladigan 2025-2026 yil Yangi yil bayramlari madaniy tadbirlari to‘g‘risidagi ma’lumotlar (tadbir o’tadigan joy, tadbir vaqti va biriktirilgan mas’ullar) shakllantirilgan bo‘lib, quyidagi havola orqali tanishishingiz mumkin.

Ta’kidlash joizki, bunday tashabbuslar ichki turizmni rivojlantirish, madaniy meros obyektlaridan samarali foydalanish hamda aholining dam olish madaniyatini yuksaltirishga xizmat qiladi. Yangi yil bayrami arafasida joriy etilayotgan chegirmalar fuqarolar va sayyohlar uchun unutilmas bayram kayfiyatini yaratishga zamin bo‘lmoqda.