Xivada 9 tonna palov tayyorlandi
2025-12-15 11:10:00 / Yangiliklar
2025-yil 14-dekabr kuni zamonaviy “Arda Xiva” turistik majmuasida O‘zbekiston Turizm qo‘mitasi tomonidan Oshpazlar assotsiatsiyasi bilan hamkorlikda tashkil etilgan “Xorazm palovi” xalqaro festivali bo‘lib o‘tdi. Mazkur tadbir turizmni rivojlantirish va hudud imidjini mustahkamlash yo‘lida muhim voqeaga aylandi. Festival milliy oshxona Xorazm an’analarini targ‘ib qilish va sayyohlarni jalb etishda samarali vosita bo‘la olishini yaqqol namoyon etdi.
Festivalning eng muhim voqeasi — mamlakat miqyosida rekord hisoblangan, ulkan qozonda bir vaqtning o‘zida 9 tonna xorazmcha palov tayyorlangani bo‘ldi. Bu jarayon ko‘plab tomoshabinlar va mehmonlarni bir joyga jamladi. Palov tayyorlash uchun 2,5 tonna go‘sht, 3 tonna sabzi, 2,5 tonna guruch hamda 750 litr paxta yog‘i ishlatildi. Taom tayyor bo‘lgach, barcha xohlovchilar palovdan tatib ko‘rish imkoniga ega bo‘ldi, bu esa bayramona kayfiyat, mehmondo‘stlik va birdamlik muhitini yaratdi.
Festival gastronomik tadbirlar hududning turistik jozibadorligini oshirishda muhim ahamiyat kasb etishini yana bir bor tasdiqladi.