O‘zbekiston va Tojikiston TXTY-2025da turizm sohasidagi hamkorlikni mustahkamlamoqda
2025-11-29 15:55:00 / Yangiliklar
“Ipak yo‘lida turizm” 30-Toshkent xalqaro turizm yarmarkasi doirasida Tojikiston Turizmni rivojlantirish qo‘mitasi raisi Jamshed Jumaxonzoda bilan uchrashuv o‘tkazildi.
Muzokaralarda ikki tomonlama hamkorlikning dolzarb yo‘nalishlarini, jumladan, qo‘shma sayyohlik yo‘nalishlarini rivojlantirish, ikki mamlakat o‘rtasidagi sayohatlarni soddalashtirish, mintaqani yagona sayyohlik makoni sifatida targ‘ib qilish, xususiy sayyohlik kompaniyalari o‘rtasidagi hamkorlikni kengaytirish masalalari muhokama qilindi.
Xalqaro turizm tadbirlari doirasida kadrlar tayyorlash, tajriba almashish va qo‘shma sa’y-harakatlarni muvofiqlashtirish masalalariga alohida e’tibor qaratildi.
Uchrashuv yakunida tomonlar o‘zaro sayyohlik oqimini oshirish va turizm sohasidagi hamkorlikni mustahkamlashga qaratilgan faol hamkorlikni davom ettirish va yangi loyihalarni ilgari surishga tayyor ekanliklarini tasdiqladilar.