“Lazzatli O‘zbekiston” festivali TXTYda turizm va gastronomiyani birlashtiradi
2025-11-27 17:15:00 / Yangiliklar
Mazkur tadbir O‘zbekiston Respublikasi Turizm qo‘mitasi tomonidan O‘zbekiston Oshpazlar uyushmasi bilan hamkorlikda tashkil etilgan bo‘lib, mamlakatga sayyohlar oqimini ko‘paytirish va turistik xizmatlar ko‘lamini kengaytirishga qaratilgan.
Festival yilning eng yirik gastronomik tadbirlaridan biri hisoblanib, 30 dan ortiq davlat, jumladan Shveytsariya, Fransiya, Ozarbayjon, Italiya, Germaniya, Turkiya va boshqa mamlakatlardan kelgan mutaxassislar hamda mehmonlarni o‘zida jamladi.
Oshpazlar chempionati Butunjahon oshpazlar hamjamiyatlari uyushmasi (WACS) standartlariga muvofiq o‘tkaziladi. O‘zbekiston va xorijiy mamlakatlardan kelgan ishtirokchilar zamonaviy gastronomik yechimlar va milliy taomlardan tortib non pishirish va shou-desertlargacha bo‘lgan 12 ta tanlov nominatsiyasi bo‘yicha o‘z mahoratlarini namoyish etadilar.
Uch kunlik dastur doirasida mahorat darslari, degustatsiyalar, gastro-ko‘rgazmalari va yosh oshpazlar o‘rtasida tanlov bo‘lib o‘tadi, unda ishtirokchilar an’anaviy taomlarning zamonaviy talqinlarini taqdim etadilar.
Bunday tadbirlar gastroturizmni rivojlantirishga hissa qo‘shadi, O‘zbekistonning boy pazandachilik madaniyatiga ega mamlakat sifatidagi imijini mustahkamlaydi hamda turizm va gastronomiya sohasida professional almashinuv va hamkorlik uchun yangi imkoniyatlar ochadi.