O‘zbekistondagi xalqaro media kampus - jahon blogerlari va OAV ko‘zi bilan mamlakatga yangicha nazar!
2025-11-24 12:15:00 / Yangiliklar
O‘tkazilish sanasi: 27 noyabr (14:00–16:00).
Joy: CAEX majmuasi (asosiy sahna), Toshkent Xalqaro Turizm Yarmarkasi doirasida.
O‘zbekiston Respublikasi Turizm qo‘mitasi xorijiy blogerlar, jurnalistlar va yetakchi xalqaro OAV vakillari ishtirokida xalqaro mediakampusni tashkil etishni rejalashtirmoqda.
Tadbir mamlakatning turistik salohiyatini yanada targ‘ib qilish, O‘zbekiston haqida yangi kontent yaratish, zamonaviy xalqaro tasavvurni shakllantirish hamda global media bilan hamkorlikni mustahkamlashni maqsad qiladi.
Mediakampusning asosiy maqsadlari: O‘zbekiston haqida yangi xalqaro vizual va matnli kontent yaratish, mamlakatning turistik imidjini global platformalarda targ‘ib etish, blogerlar va OAV bilan uzoq muddatli hamkorlikni yo‘lga qo‘yish, kontent yaratuvchilarni O‘zbekiston haqidagi yangi loyihalarga ilhomlantirish va mamlakatning ijobiy xalqaro narrativini mustahkamlashdir.
Ishtirokchilar O‘zbekistonning to‘rtta asosiy turistik markaziga tashrif buyuradilar: Toshkent, Samarqand, Buxoro va Xiva shaharlariga.
Press-tur davomida blogerlar foto, video va matnli kontent yaratib, o‘z xalqaro auditoriyalariga taassurotlarini ulashadilar.
Mediakampusning kulminatsiyasi — “Uzbekistan Through New Eyes: Creating Stories That Inspire the World” mavzusidagi mediaforum bo‘ladi.
Mediaforum media sohasining professionallari, inflyuenserlar va ekspertlarni birlashtirib, jalb etuvchi kontent yaratish bo‘yicha zamonaviy yondashuvlar, storitelling, madaniy va tarixiy maskanlarda foto/video suratga olish, TikTok, YouTube va Instagram’dagi yangi trendlar, mamlakat imidjini shakllantirishdagi blogerlar roli, xalqaro media-loyihalar va kollaboratsiyalar imkoniyatlarini muhokama qiladi.
Forum dasturiga ochilish marosimi va Keynote (Qo‘mita vakilining nutqi), xalqaro va o‘zbek blogerlari ishtirokidagi “Creating Engaging Stories: From City Streets to Ancient Sites” va “Spotlight Talks by Bloggers. How to Make Uzbekistan Go Viral” panel muhokamalari kiradi.
Mediakampus va uning doirasidagi forum O‘zbekistonni yorqin, mehmondo‘st va zamonaviy turistik yo‘nalish sifatida global miqyosda targ‘ib qilish yo‘lida muhim qadamdir.