O‘zbekiston va Qatar turizm sohasidagi hamkorlik istiqbollarini muhokama qildi
2025-11-13 12:30:00 / Yangiliklar
Saudiya Arabistonining Ar-Riyod shahrida Butunjahon turizm tashkiloti Bosh Assambleyasining 26-sessiyasi doirasida Turizm qo‘mitasi raisi Umid Shadiyev Qatar Davlati Turizm boshqarmasi raisi Saad Al-Xarjiy bilan uchrashdi.
Suhbat davomida tomonlar hamkorlikning istiqbolli yo‘nalishlarini muhokama qilib, 2026-2027-yillarga mo‘ljallangan turizm sohasidagi hamkorlik dasturini tayyorlashga kelishib oldilar. Ushbu hujjat sayyohlik almashinuvini rivojlantirish, ishbilarmonlik aloqalarini kengaytirish va ikki mamlakatning sayyohlik imkoniyatlarini targ‘ib qilish bo‘yicha qo‘shma tashabbuslarni amalga oshirishga qaratiladi.
Shuningdek, turizmni raqamlashtirish sohasida tajriba almashish, turizm infratuzilmasiga sarmoyalarni jalb etish hamda madaniy va tadbir turizmi bo‘yicha qo‘shma loyihalarni ishlab chiqish masalalari ko‘rib chiqildi.