O‘zbekiston Respublikasi Turizm qo‘mitasi

Tadbir O‘zbekiston Madaniyat va san’atni rivojlantirish jamg‘armasi, O‘zbekiston Fanlar akademiyasi, Samarqand arxeologiya instituti hamda Samarqand viloyati hokimligi tomonidan YUNESKO ko‘magida tashkil etildi.

Forum dunyoning yetakchi olimlari, tadqiqotchilari va xalqaro tashkilotlar vakillarini bir joyga jamladi. Ishtirokchilar arxeologik kashfiyotlar, Zarafshon vodiysining shaharsozlik rivoji hamda Samarqandning jahon sivilizatsiyasi tarixidagi o‘rni haqida fikr almashdilar. Konferensiya ishida YUNESKO Butunjahon merosi markazi direktori Lazare Elundu Assomo, professor Temur Shirinov va doktor Klod Rapen kabi nufuzli mutaxassislar ishtirok etdi.

Konferensiya arxeologiya, madaniy merosni asrash va tarixiy shaharlarni ijodiy yo‘nalishda rivojlantirish sohalarida ilmiy almashinuv va xalqaro hamkorlikni mustahkamlashga xizmat qilgan muhim maydonga aylandi.

Muhokamalar davomida xalqaro hamkorlik doirasida olib borilgan tadqiqotlar asosida Samarqandning tarixi uch ming yildan kam emas, degan ilmiy xulosaga kelindi. Ilgari ta’kidlanib kelingan 2750 yillik baholash endi qayta ko‘rib chiqilib, Samarqandning yoshi rasman 3000 yil deb belgilandi.