O‘zbekiston Respublikasi Sport vazirining vazirlik tizimidagi xodimlar, fuqarolar va jamoatchilik vakillariga MUROJAATNOMASI
2025-03-18 13:45:00 / Rahbariyatning bayonotlari va nutqlari
Assalomu alaykum, hurmatli hamkasblar!
Mamlakatimizda korrupsiyaning oldini olish va unga qarshi kurashish, jamiyatning barcha sohalarida korrupsion holatlarni keltirib chiqaruvchi omillarga chek qo‘yishga qaratilgan keng ko‘lamli islohotlar olib borilmoqda.
Jumladan, O‘zbekiston Respublikasining “Korrupsiyaga qarshi kurashish to‘g‘risida”gi Qonuni va qator Farmon, Qarorlar qabul qilinib, korrupsiyani oldini olish bo‘yicha ustuvor vazifalar belgilab berildi.
Korrupsiyaga qarshi kurashish bo‘yicha Milliy kengash yig‘ilishida Davlatimiz rahbari o‘z nutqida korrupsiya - islohotlar yo‘lidagi eng katta to‘siq va g‘ov ekanini ta’kidladi.
Fikri toza, korrupsiyaga toqatsiz yangi avlodni tarbiyalash maqsadida ta’lim maskanlarida halollik g‘oyalarini singdirish, ularning tashabbuslarini qo‘llab-quvvatlash muhimligi ko‘rsatib o‘tildi.
Davlatimiz rahbarining jamoatchilikka murojaatida korrupsiyaga qarshi kurashish umummilliy vazifa, har bir vatanparvar yurtdoshimizning vijdon ishi ekanligi ta’kidlab o‘tildi.
Umuman, ilk marotaba bunday tarzda yig‘ilish o‘tkazilishi korrupsiyaga qarshi kuchli siyosiy irodani namoyon etdi. Davlatimiz rahbari 55 ta aniq maqsadga yo‘naltirilgan tashabbuslarni ilgari surdi.
Ular doirasida 5 ta qonun, 12 ta farmon va qarorlar ishlab chiqiladi. Korrupsiyaga qarshi kurashishda Parlament, Milliy va hududiy kengashlar, fuqarolik jamiyati institutlarining roli oshiriladi.
Vazirligimiz tizimida ham korrupsiyaviy holatlarni oldini olish bo‘yicha bir qancha amaliy ishlar qilinmoqda. Xususan, vazirlik markaziy apparatida korrupsiyaga qarshi kurashish va huquqiy nazorat bo‘limi faoliyat ko‘rsatmoqda. Korrupsiyaga qarshi kurashish bo‘yicha chora-tadbirlar dasturi va korrupsiyaviy xavf-xatarlar xaritasi tasdiqlanib, ustuvor vazifalar belgilab olindi. Shuningdek, sohani raqamlashtirish orqali shaffoflikni ta’minlash bo‘yicha tizimda 24 ta yo‘nalishdagi loyihalarni qamrab olgan, “ERP sport” yagona elektron boshqaruv tizimi sport sohasiga bosqichma-bosqich joriy etilmoqda. Bu kabi ishlarimiz bundan keyin ham davom ettiriladi.
Vazirligimizni korrupsiyasiz sohaga aylantirish uchun barcha kuch va imkoniyatlar mavjud va biz ulardan foydalanamiz.
Hurmatli hamkasblar!
Sport vazirligi tizimi xodimi degan yuksak sharafli maqom egasi sifatida shubha uyg‘otuvchi harakatlar, so‘zlardan tiyilishimiz, hamma joyda yurish-turishimiz, harakatlarimiz bilan boshqa davlat xizmatchilariga va oila a’zolarimizga namuna bo‘lishimiz zarur.
Shunday ekan vazirlik tizimidagi barcha xodimlar o‘z xizmat vazifalarini bajarishda:
- vazirlikning korrupsiyaga qarshi kurashish siyosatiga amal qilishi hamda uning tamoyillari va talablariga qat’iy rioya etishlari kerak;
- korrupsiya bilan bog‘liq har qanday xatti-harakatlarda ishtirok etishi taqiqlanadi;
- xodimlar ularni korrupsiya bilan bog‘liq huquqbuzarlikni sodir etishga undovchi shaxslarning har qanday murojaatlari to‘g‘risida, shuningdek, boshqa xodimlar tomonidan sodir etilgan korrupsiyaga oid qonunbuzilish holatlari haqida o‘z rahbarlariga va Vazirlikning korrupsiyaga qarshi kurashish va huquqiy nazorat bo‘limiga xabar berishlari shart;
- bevosita rahbari yoki mas’ul shaxsni manfaatlar to‘qnashuvi ehtimoli haqida xabardor qilishi lozim.
Har birimiz o‘z ishimizga halol va vijdonan yondashsak, albatta oldimizga qo‘yilgan maqsadlarga erishamiz.
Vazirlik tizimida faoliyat olib borayotgan har bir xodim har qanday korrupsiyaviy holat uchun jazo muqarrarligini va kechirilmasligini bilishi shart!
Hurmatli fuqarolar va jamoatchilik vakillari!
Sport vazirligini “korrupsiyasiz soha”ga aylantirishda jamoatchilik vakillari hamda fuqarolarimiz roli alohida ahamiyat kasb etadi. Shu sababli Vazirlik tizimida korrupsiyaga qarshi kurashish bo‘yicha Sizlarni hamkorlikka chaqirib qolamiz. Tizimdagi korrupsiyaviy holatlar yuzasidan fikr-mulohazalar va takliflar uchun vazirlikning telegram messendjerida YSSV_antikorbot, “call-markaz” (55-5209007) hamda ishonch telefoni +998 (71) 239 24-56 ishga tushirilgan.
Agar Siz korrupsiyaviy holatlarga duch kelsangiz ushbu aloqa vositalari orqali bizga murojaat qilishingiz so‘raladi.
Barcha axborotlar va ularning mualliflari haqidagi ma’lumotlar sir saqlanishi kafolatlanadi.