A.I.Gersen nomidagi Rossiya davlat pedagogika universiteti bilan hamkorlik aloqalari muhokama qilindi
2025-03-15 09:00:00 / Yangiliklar
Joriy yilning 13-fevral kuni O‘zbekiston Respublikasi Prezidenti Sh.Mirziyoyev rahbarligida olimpiya va paralimpiya harakati, ixtisoslashtirilgan va ommaviy sportni yangi bosqichga olib chiqish hamda aholining jismoniy faolligini oshirishga
bag‘ishlangan videoselektor yig‘ilishida berilgan topshiriqlar ijrosini ta’minlash maqsadida O‘zbekiston Milliy paralimpiya qo‘mitasi rahbariyati Sankt-Peterburg shahrida joylashgan A.I.Gersen nomidagi Rossiya davlat pedagogika universitetida bo‘ldi.
Tashrif doirasida Universitet rahbariyati bilan uchrashuv o‘tkazildi. Unda tomonlar hamkorlikning turli imkoniyatlarini keng muhokama qilib, o‘zaro aloqalarni yaqindan yo‘lga qo‘yishga kelishib oldi. Shuningdek, may oyida Namangan shahrida o‘tkazilishi rejalashtirilayotgan konferensiyada Gersen Universiteti tomonidan taqdimot qilinishi haqida ta’kidlab o‘tildi.
Tashrif davomida qo‘mita rahbariyati universitet kafedralari hamda boy tarixga ega qadimiy kutubxonasida bo‘lib, muhim metodologik qo‘llanmalar almashinuvi masalasida ham kelishuvlarga erishildi.
Shundan so‘ng, Sankt-Peterburgdagi Adaptiv jismoniy tarbiya va adaptiv sport markaziga tashrif buyurildi hamda u yerda yaratilgan sharoitlar, tashkiliy tuzilma va ish tizimi bilan yaqindan tanishildi.
Web-Sayt (https://gov.uz/sport/) | Telegram (https://t.me/Minsportuz) | Facebook (http://fb.com/MinistrySportUz) | Instagram (https://www.instagram.com/minsport.uz/) | Youtube (http://bit.ly/30pICdW)