Andijon viloyatida oliy ta’lim tizimida dual ta’limni tashkil etish bo‘yicha amaliy ishlar izchil davom etmoqda
2026-04-15 15:45:00 / Yangiliklar
Xususan, viloyat hokimi o‘rinbosari K.Komilov hamda viloyat sport boshqarmasi boshlig‘i O'.Toshpo'latov tashabbusi bilan Andijon davlat universiteti va Andijon davlat pedagogika instituti rektorlari hamkorligida bitiruvchi hamda 2–3-bosqich talabalari bilan uchrashuv tashkil etildi.
Uchrashuv davomida talabalarga dual ta’lim tizimining mazmun-mohiyati, uning amaliy ahamiyati hamda jismoniy tarbiya va sport yo‘nalishida kadrlar tayyorlashdagi o‘rni haqida batafsil ma’lumotlar berildi. Shu bilan birga, yosh mutaxassislarning nazariy bilimlarini amaliyot bilan uyg‘unlashtirish, ularni kasbiy faoliyatga bosqichma-bosqich jalb etish masalalariga alohida e’tibor qaratildi.
Mazkur tizim asosida talabalar o‘z yashash hududlaridagi mahallalarga yoki yaqin manzillarda faoliyat yuritayotgan hududiy sport maktablarining seleksioner-trenerlariga biriktirildi. Bu orqali ular aholi o‘rtasida sog‘lom turmush tarzini targ‘ib qilish, ommaviy sport tadbirlarini tashkil etish, iqtidorli yoshlarni saralab olish hamda sport bilan muntazam shug‘ullanishga yo‘naltirish ishlarida faol ishtirok etadi.
Ushbu chora-tadbirlar yoshlarning bandligini ta’minlash, ularning kasbiy ko‘nikmalarini mustahkamlash hamda hududlarda sport infratuzilmasidan samarali foydalanishga xizmat qiladi.