Sayyor qabul: Qashqadaryoda sport sohasi muammolari joyida o‘rganildi: vazir o‘rinbosari ishtirokida sayyor qabul o‘tkazildi
2026-02-23 16:00:00 / E'lonlar
Bugun Qashqadaryo viloyati Sport boshqarmasida Sport vaziri o‘rinbosari Murad Ismailov ishtirokida sport sohasi vakillari uchun sayyor qabul tashkil etildi.
Mazkur uchrashuv sport tizimidagi dolzarb masalalarni joyida o‘rganish, murabbiy va sportchilarning murojaatlarini tinglash hamda ularning yechimi bo‘yicha amaliy choralar ko‘rishga qaratilgani bilan ahamiyatli bo‘ldi.
Sayyor qabul davomida sport ta’lim muassasalarining moddiy-texnik bazasini mustahkamlash, zamonaviy sport jihozlari bilan ta’minlash, mavjud infratuzilmani yaxshilash, sportchilar uchun munosib sharoitlar yaratish kabi masalalar atroflicha muhokama qilindi.
Murabbiylar, sportchi-yoshlar hamda soha mutaxassislari o‘zlarini qiziqtirgan muammolar, taklif va tashabbuslarini bildirdilar.
Murojaatlarning aksariyat qismi joyida ijobiy hal etilib, qolgan masalalar yuzasidan mas’ul rahbar va mutasaddilarga aniq topshiriqlar berildi hamda ularning ijrosini ta’minlash bo‘yicha tegishli ko‘rsatmalar berildi. Bu esa hududlarda sportni yanada rivojlantirish, yoshlar uchun keng imkoniyatlar yaratish yo‘lida muhim qadam bo‘ldi.
Uchrashuvda Qashqadaryo viloyati Sport boshqarmasi boshlig‘i Vahob Ro‘ziyev, Milliy Olimpiya qo‘mitasining viloyat hududiy bo‘limi ijrochi direktori Erkin Vahidov, sport ta’lim muassasalari rahbarlari, trenerlar hamda sportchilar ishtirok etdi.
Xizmat safari davomida Murad Ismailov Qarshi shahridagi Kurash mahorat maktabida ham bo‘lib, bu yerda sportchi-o‘quvchilar uchun yaratilgan shart-sharoitlar bilan yaqindan tanishdi.
Xususan, mashg‘ulotlar zali, yotoqxona, oshxona va boshqa infratuzilma obyektlari ko‘zdan kechirildi. Vazir o‘rinbosari tomonidan sportchilarni har tomonlama qo‘llab-quvvatlash, ularning yuqori natijalarga erishishi uchun zarur sharoitlarni yanada yaxshilash yuzasidan tegishli tavsiya va ko‘rsatmalar berildi.