Sport vaziri o‘rinbosari Shaxrillo Maxmudov Buxoroda sayyor qabul o‘tkazdi
2026-02-03 12:00:00 / Yangiliklar
Sport vaziri o‘rinbosari Shaxrillo Maxmudov sport ta’lim muassasalari direktorlari, viloyat sport boshqarmasi xodimlari hamda fuqarolar va tadbirkorlik subyektlari ishtirokida sayyor qabul o‘tkazdi.
Buxoro Olimpiya va paralimpiya sport turlariga tayyorlash markazida tashkil etilgan uchrashuv davomida joylarda mavjud muammolar, sohada uchrayotgan kamchiliklar hamda tizim faoliyatini yanada takomillashtirishga qaratilgan takliflar tinglandi. Mutasaddilar tomonidan bildirilgan masalalar yuzasidan tegishli tushuntirishlar berilib, ularning yechimi bo‘yicha aniq vazifalar belgilandi.
Shuningdek, yig‘ilishda bir qator muhim yo‘nalishlar muhokama qilindi. Xususan, sport sohasida ERP tizimini takomillashtirish, respublika sport federatsiyalari bilan hamkorlik aloqalarini mustahkamlash, trenerlar va mutaxassislarning malakasini oshirish, shuningdek, “Prezident Olimpiadasi” musobaqalariga puxta va munosib tayyorgarlik ko‘rish masalalariga alohida e’tibor qaratildi.
Yakunda soha faoliyatini samarali tashkil etish, sportchilarni tayyorlash sifatini oshirish hamda belgilangan vazifalarni o‘z vaqtida va sifatli bajarish yuzasidan tegishli topshiriqlar berildi.