O‘zbekiston Respublikаsi Din ishlаri bo‘yichа qo‘mitаsi

Joriy yilning 10-dekabr kuni Din ishlari bo‘yicha qo‘mitada “10-dekabr – O‘zbekiston Respublikasi davlat madhiyasi qabul qilingan kun” hamda "9-dekabr – Xalqaro korrupsiyaga qarshi kurashish kuni" munosabati bilan ma’naviy-ma’rifiy bayram tadbiri bo‘lib o‘tdi.

Bayram tadbiri Davlatimiz madhiyasining Qo‘mita xodimlari tomonidan jo‘r ovozdagi kuylashlari bilan boshlandi.

Tadbirni Qo‘mita raisining birinchi o‘rinbosari D.Maxsudov kirish nutqi bilan ochib berdi. 

O‘zbekiston Respublikasi davlat madhiyasining mustaqil davlat ramzi sifatida xalqimiz qalbida yuksak g‘urur va iftixor uyg‘otishini, ayni paytda jamiyatni birlashtiruvchi ma’naviy kuch ekani ta’kidlandi. Madhiya qabul qilingan kun – milliy o‘zlikni anglash va vatanparvarlik tuyg‘ularini mustahkamlashda muhim sana ekani qayd etildi.

Shuningdek, korrupsiya har qanday jamiyat taraqqiyotiga jiddiy to‘sqinlik qiluvchi illat ekanini, unga qarshi kurashishda davlat organlari bilan bir qatorda, har bir xodimning mas’uliyati va halolligi muhim o‘rin tutishini alohida takidlandi.

Shundan so‘ng, mehmon sifatida taklif etilgan Korrupsiyaga qarshi kurash agentligi mas'ul xodimi Sh.G'ulomov tomonidan korrupsiyaning oldini olishda tizimli yondashuv, halollik standartlari, manfaatlar to‘qnashuvining oldini olish mexanizmlari, shaffoflikni oshirish va ochiq ma’lumotlar tizimidan samarali foydalanish muhimligi ta’kidlandi. Shuningdek, Agentlik tomonidan davlat xizmatida halollik muhitini shakllantirish, xodimlar o‘rtasida korrupsiyaga nisbatan mutlaq murosasizlik kayfiyatini kuchaytirish bo‘yicha olib borilayotgan islohotlar va yangi tashabbuslar haqida ma'lumot berildi.

Tadbir davlat ramzlariga hurmat ruhini yanada mustahkamlash, xodimlarda vatanparvarlik tuyg‘ularini kuchaytirish, shuningdek, korrupsiyaga nisbatan murosasiz munosabatni shakllantirishda muhim ahamiyat kasb etdi.

Din ishlari boʻyicha qoʻmita 
Axborot xizmati