Qamashi tumanidagi fermerdan yuqori hosildorlik: 1,5 gektardan 100 tonna piyoz
2025-08-23 16:41:00 / Yangiliklar
Qamashi tumani Chim mahallasida faoliyat yuritayotgan “Abdirahmon bobo Jo‘ra o‘g‘li” fermer xo‘jaligi samarali mehnat va ilg‘or agrotexnik tadbirlar orqali yuqori hosildorlikka erishmoqda.
Xo‘jalik tomonidan 1,5 gektar maydonga piyoz urug‘i ekilib, yuqori hosildorlikka erishildi. Hozirda 10 sotix maydonda 6,5 tonnadan ziyod hosil yig‘ishtirib olindi. Bu ko‘rsatkich har gektarga o‘rtacha 66 tonnadan to‘g‘ri kelib, soha mutaxassislari tomonidan yuqori samarali natija sifatida baholanmoqda.
Fermer xo‘jaligi rahbari Nizomiddin Erdanovning aytishicha, jami 2 gektar yerda qishloq xo‘jaligi mahsulotlari yetishtirilayotgan bo‘lib, piyozdan tashqari pomidor, kadi, qovun va tarvuz kabi poliz mahsulotlari ham parvarish qilinmoqda.
Shuningdek, yetishtirilgan mahsulotlar to‘g‘ridan to‘g‘ri iste’molchilarga yetkazilishi maqsadida xo‘jalik hududida “Dala do‘koni” tashkil etilgan. Bu esa 6 nafar mahalliy aholi uchun doimiy daromad manbaiga aylandi.