Qashqadaryolik xotin-qizlarning tadbirkorlik faoliyati o‘rganildi
2025-02-14 09:05:00 / Yangiliklar
“Hamroh” xotin-qizlar tadbirkorligini qo‘llab-quvvatlash kompaniyasi, O‘zbekiston Savdo-sanoat palatasi hamda “Xalq banki” vakillari Dehqonobod va G‘uzor tumanlarida faoliyat yuritayotgan tadbirkor ayollarning ish tajribasi bilan tanishdilar.
Dastlab, Dehqonobod tumanida faoliyat olib borayotgan tadbirkor Feruza Norsafarovaning ish faoliyati ko‘zdan kechirildi. U rahbarlik qilayotgan davlat-xususiy sheriklik asosida tashkil etilgan nodavlat maktabgacha ta’lim muassasalari va mehmonxonalar faoliyati bilan tanishuv bo‘lib o‘tdi. Shuningdek, tadbirkor tomonidan barpo etilgan pista bog‘i ham mehmonlarda katta qiziqish uyg‘otdi.
Tashrif davomida mehmonlar Dehqonoboddagi hunarmandlar markazida ham bo‘lishdi. Bu yerda milliy an’analarga asoslangan qo‘l mehnati mahsulotlari bilan yaqindan tanishdilar.
Shuningdek, G‘uzor tumanida issiqxonachilik bilan shug‘ullanib, oilaviy daromad topayotgan ayollarning faoliyati ham o‘rganildi.